“Qarabağ” bu gün Çempionlar Liqasının 2-ci təsnifat mərhələsinin cavab matçında çıxacaq.

"Football-plus.az" xəbər verir ki, ilk oyunda “Linkoln Red İmps”i məğlub edən “köhlən atlar”ın (2:0) ikinci görüşü də “CBC Sport”la canlı yayınlanacaq.

Qarabağ – Linkoln Red İmps (Cəbəllüttariq) 5:0
Olavio Juninyo, 17; 31; 44. Yassin Benzya, 66. Leandro Andrade, 72.
Hakiimlər: YAKOB SUDBERQ, Dəniz Yurdakul, Viktor Skitte, Yakob Karlsen (hamısı Danimarka).
30 iyul. Bakı. Tofiq Bəhramov adına Respublika stadionu. Saat 20.00.

Bilindiyi kimi, Ağdam təmsilçisi ilk oyunda sürprizə imkan vermədi, növbəti mərhələyə vəsiqəni, demək olar ki, təmin etdi. Hətta bu oyunun formal xarakter daşıdığını da deyə bilərik. Hər halda, “Qarabağ”ın “Linkoln Red İmps”i mübarizədən kənarlaşdıracağı dəqiq görünür. Bəli, bu futboldu və futbolda hər şey ola bilər. Lakin “köhlən atlar”ın real gücü və “doğma divarlar” amili azmış kimi, rəqibin çox böyük azarkeş təzyiqi altında çıxış edəcəyi istisna deyil. Yəni meydanda məğlubiyyəti qəbullanmış cəbəllüttariqlilərlə hədəfin Çempionlar Liqasının qrup mərhələsi olduğunu elan edən Qurban Qurbanovun komandasını görəcəyik. Odu ki, oyunu istər televiziyadan, istərsə də stadiondan izləyəcək azarkeşlər futboldan zövq alacaq. Çox əmin danışmadım ki?! Bəlkə də. Amma bu dəfə özümüzü ovutmağa, ruh, həvəs kimi mücərrəd anlayışlara bel bağlamağa məcbur deyilik. Çünki təmsilçimiz istənilən cəhətdən rəqibini üstələyir. Bu dəfə hər şey bizim tərəfimizdədi!

Heyətlərə gəlincə, “Linkoln Red İmps” srağagün Cirardo Rubionu transfer edib. Bu komandada başqa dəyişiklik yoxdusa, “Qarabağ”dan Musa Qurbanlının əməliyyat edildiyini də bilirik, qırmızı vərəqə cəzalısı Elvin Cəfərquliyevin meydana çıxmayacağını da. Belədə Qurban Qurbanov, çox güman, heyətə güvənəcək: Fabiyan Buntiç, Toral Bayramov, Kevin Medina, Bəhlul Mustafazadə, Marko Veşoviç, Marko Yanukoviç, Julio Romao, Yassin Benzya, Abdulla Zubir, Leandro Andrade, Olaviyo Juninyo.

KƏNAN BAHADIR