Bu gün “Zirə”, “Sabah” və “Sumqayıt” Konfrans Liqası çərçivəsində meydana çıxacaq.

Bilindiyi kimi “Zirə” “DAC 1904”, “Sumqayıt” “Fehervar” ilə evdə, “Sabah” isə “Makkabi” ilə səfərdə, daha doğrusu, Macarıstanda qarşılaşacaq. “Sabah”ın bəxtinə daha çətin rəqib düşdüyü aydındı. “Sumqayıt”ın israilli futbolçusu Roy Kehat ölkəsinin mətbuatına müsahibə verib. “Football-plus.az” İsrail mediasına istinadla xəbər verir ki, 32 yaşlı yarımmüdafiəçi “Makkabi” – “Sabah” görüşüylə bağlı ona ünvanlanan sualları cavablayarkən Azərbaycan xalqının “Sabah”a rəqib kimi “Makkabi”nin düşməsinə görə üzüldüyünü bildirib.

- “Makkabi”nın rəqibi haqda nə deyə bilərsən?
- Ötən illə müqayisədə çox dəyişiklik olduğu üçün bunu dərindən təhlil edə bilmirəm. Ötən mövsüm “Sabah” mövsümə pis başladı. Amma qış fasiləsindən sonra özünə qayıtdı.

- “Sabah”ın “Makkabi” ilə müqayisədə güc balansı haqqında nə düşünürsən?
- Burda adamların çoxu “Makkabi”ni tanıyır və onun “Neftçi” üzərindəki qələbələrini xatırlayır. Həmçinin Avropada son illərdə “Makkabi”nin nailiyyətlərini görüblər. Burdakı insanların əksəriyyəti “Makkabi”nin növbəti mərhələyə keçməli olduğunu düşünür. Buna görə də “Sabah” üçün üzgündülər. Şəxsən mən bunun asan olacağını düşünmürəm. Ancaq son illərdəki çıxışını nəzərə alsam, məncə, “Makkabi” növbəti mərhələyə adlayacaq.

KAMAL SƏFƏR