“Mümkün rəqiblər sırasında ən çətin variantla üzləşdik” – “Sabah”ın kapitanı narazıdı?
“Sabah” Konfrans Liqasının 2-ci təsnifat mərhələsində Hayfa “Makkabi”si ilə qarşılaşacaq.
“Bayquşlar” ilk oyunu iyulun 25-də səfərdə, cavab görüşünü isə bir həftə sonra Bakıda keçirəcək.
“Football-plus.az” xəbər verir ki, çoxları İsrail təmsilçisinin “tələbələr” üçün çətin rəqib olduğunu düşünür. Mövzuyla bağlı “Sabah”ın kapitanı Elvin Camalovun fikirlərini öyrəndik. Onun dedikləri:
“Püşkatmadan əvvəl də çətin rəqiblə qarşılacağımız bəlli idi. Komanda avrokuboklara vəsiqə qazanıbsa, deməli, ölkəsinin ən güclüləri sırasındadı. İstənilən halda, hansısa rəqibi asan adlandırmaq doğru olmaz. Yenə də məncə, mümkün rəqiblər sırasında ən çətin variantla üzləşdik. Düşünürəm ki, narazılıq etməyə dəyməz. Meydana çıxıb ən yaxşı şəkildə mübarizə aparmalıyıq. İnanıram ki, “Makkabi” ilə matçlarda müsbət nəticə qazanıb azarkeşlərimizi, bizə inananları sevindirəcəyik”.
Elvinin oyunun İsraildə yox, Macarıstanda keçirilməsi haqda düşüncələri:
“Matçın harda olacağının ciddi fərqi yoxdu. Düzdü, rəqib böyük ölçüdə azarkeş dəstəyindən məhrum olacaq. Lakin bu amil komandanın gücünü azaltmır. İstənilən halda bizi qarşıda “Makkabi” ilə iki çətin və maraqlı oyun gözləyir”.
KƏNAN BAHADIR
Digər xəbərlər
