“Əslində bu barədə fikir bildirmək asandı, sadəcə, “Qarabağ”ın belə oyunun öhdəsindən gələ bilib-bilməyəcəyi sual doğurur. Oyunun mümkün axarı barədə bunu deyə bilərəm: çox güman, “Bayer-04” Bakıdakı oyunun ikinci yarısına necə başlamışdısa, cavab görüşünə də elə start verəcək. Doğrusu, bilmirəm ki, Xabi Alonso əsas heyəti meydana buraxacaq, yoxsa yenə ikinci heyətlə start götürəcək? Bunu təxmin etmək çətindi. Amma əsas heyətlə meydançaya çıxsalar, bizim onları üstələmək şansımız yenə də əks-hücumlarda olacaq. Yəni rəqibi qarşılayarkən topu ələ keçirəyin və həmin yığcamlığı saxlamağın lazım gələcəyini düşünürəm. Çox güman, yenə də 4-2-3-1 taktiki düzülüşüylə meydana çıxacağıq. Hücumun sivri ucunda bir oyunçumuz olacaq. Ümid edirəm ki, Olaviyo Juninyonun vəziyyəti yaxşıdı və bu qarşılaşmada iştirak edə biləcək. Çünki Conatan Ta kimi “ağır” mərkəz müdafiəçisindən yayınmaqdan ötrü sürətli hücumçuya ehtiyacımız var. Nəriman Axundzadə də bunun öhdəsindən gələ bilər. Lakin Nərimanın təcrübəsi Juninyo ilə müqayisədə daha azdı. Hesab edirəm ki, rəqibi mərkəzdə qarşılayacağıq. Onların qapımızın qarşısına çox yaxın olmaları çox təhlükəlidi. Çünki heyətlərində Florian Virts, Patrik Şik, Qranit Caka kimi futbolçular var. Hansı ki, bu oyunçular cərimə meydançasının ətrafında istənilən an hər şeyi etməyə qadirdi. Buna görə də nisbətən öndə çıxış edən futbolçularımız, məsələn, yarımmüdafiəçilərimiz və hücumçularımız həddən artıq çox məsafə qət etməli olacaqlar. Belə oyun sərgilədiyimiz halda isə matçın Almaniyada keçirilməsinə baxmayaraq, yüzdəyüz qol imkanlarımız olacaq. Fürsət yaranacağı təqdirdə də bu imkanları reallaşdırmaq lazım gələcək ki, yalnız o zaman bu mərhələni keçməyə ümid edə bilərik. Hər halda, “Bayer-04” ilə oyunda hesabda önə keçməyin Bakıdakı görüşdəkindən daha çətin olacağını düşünürəm. Bu matçdan azarkeş kimi həzz almalıyıq. Hesab edirəm ki, böyükhesablı məğlubiyyət olmayacaq. Sadəcə, rəqibin usta futbolçularının qarşısını ala bilsək və əks-hücumda sürətli oynasaq, bu görüşdən qalib ayrıla bilərik”.