FİFA Amerika Kubokunun qalibi olan Argentina yığmasına sanksiya tətbiq edə bilər.

Ali futbol təşkilatı futbolçuların irqçi şüarlar səsləndirdiyi video ilə bağlı araşdırmaya başlayıb. “RMC Sport”un məlumatına görə, FİFA sosial şəbəkələrdə yayılan video əsasında insident araşdırır. Təşkilatın bəyanatında oyunçular, azarkeşlər və rəsmilər də daxil olmaqla, hər kəs tərəfindən ayrı-seçkiliyin istənilən formasının qətiyyətlə pisləndiyi bildirilir. Qeyd edək ki, sosial şəbəkələrdə yayınlanan canlı yayının bir hissəsində argentinalılar “onlar Fransa üçün oynayırlar, amma hamısı anqolalıdılar” – deyə oxuyurlar.

Daha əvvəl Fransa Futbol Federasiyasının (FFF) mətbuat xidmətinin bəyanatında bu qurumun prezidenti Filip Diallonun Argentina millisinin futbolçularının davranışından narazı olduğu və FFF-nin bununla bağlı FİFA-ya şikayət edəcəyi vurğlanmışdı.