FİFA Serbiya, Meksika və Ekvadorun futbol qurumlarına sanksiya tətbiq edib.

Football-plus.az xəbər verir ki, buna Qətərdə keçirilən dünya çempionatında baş verən insidentlər səbəb olub.

Ali futbol qurumunun rəsmi saytının məlumatına görə, Serbiya Futbol İttifaqı (SFİ) 50 min İsveçrə frankı məbləğində cərimələnib. Serblər FİFA-nın bayrağı altında keçiriləcək növbəti rəsmi oyunda yerli stadionun qismən bağlanması (tribunaların 25 faizi üçün bilet satılmayacaq) ilə də cəzalanıblar. Buna Serbiya yığmasının DÇ-2022-nin qrup mərhələsinin İsveçrə ilə oyunu (2:3) zamanı intizam qaydalarını pozması səbəb olub. SFİ oyunçuların və futbol rəsmilərinin nalayiq davranışlar nümayiş etməsində ittiham olunub. Üstəlik həmin matçda serb azarkeşlər yersiz şüarlar səsləndiriblər.

Meksika Futbol Federasiyası 100 min İsveçrə frankı məbləğində cərimələnib. Şumali amerikalılar FİFA-nın bayrağı altında bir matçı tamaşaçısız keçirməklə də cəzalanıblar. Lakin bu qərar sınaq müddəti ilə şərti xarakter daşıyır. Meksikalıların cəzalandırılmasına səbəb DÇ-2022-nin qrup mərhələsinin Polşa (0:0) və Səudiyyə Ərəbistanı (2:1) ilə matçlarında azarkeşlərin yersiz şüarlar səsləndirməsi olub.

Ekvador Futbol Federasiyası isə 20 min İsveçrə frankı məbləğində cərimələnib. Həmçinin FİFA-nın bayrağı altında keçiriləcək növbəti rəsmi matç üçün yerli stadionun qismən bağlanmasına qərar verilib. Buna DÇ-2022-nin qrup mərhələsinin Qətərlə oyununda (2:0) ekvadorlu azarkeşlərin yersiz şüarlar səsləndirməsi səbəb olub.

Əlavə edək ki, FİFA Argentina və Xorvatiya yığmalarına qarşı intizam işi açıb. Buna Fransa ilə final oyunu zamanı Argentina millisinin oyunçuları və rəsmi nümayəndələrinin aqressiv davranış nümayiş etdirməsi səbəb olub. Xorvatiya millisinin Mərakeşlə 3-cü yer uğrunda keçirilən matçda avropalı azarkeşlərin rəqibə qarşı milli və dini ayrıseçkiliklə bağlı davranışları təhqiqata rəvac verib.