“İştirak ərizəsi üçün son gün iyulun 19-du” – “Sumqayıt” rəsmisi
Təlim-məşq toplanışının ikinci mərhələsini Türkiyədə davam etdirən “Sumqayıt” vətənə döndü.
“Football-plus.az” xəbər verir ki, Ankaranın Qızılcahamam bölgəsində toplanan Samir Abasovun yetirmələri artıq iyulun 25-də “Fehervar”la keçirəcəyi oyuna köklənib. Bu oyuna nə qədər bilet satıldığını və iştirak ərizəsini UEFA-ya göndərib-göndərmədiklərini öyrənmək üçün klubun mətbuat xidmətinin rəhbəri Zaur Xudiyevlə əlaqə saxladıq:
“Sonuncu məlumata görə, artıq 2800 bilet satılıb. İştirak ərizəsi üçün son gün iyulun 19-du. Hələ ki tam hazır deyil. Hazır olan kimi klub tərəfindən rəsmi şəkildə açıqlanacaq”.
Göründüyü kimi, Abasov əlində olan heyətlə Konfrans Liqasında çıxış edəcək. Bəs “kimyaçılar” üçün yay “transfer pəncərəsi”nin bitdiyini demək olarmı? Klub rəsmisi mövzunu belə şərh etdi:
“Transfer çalışmalarımız yekunlaşmayıb. Konfrans Liqası öz yerində, qarşıdakı mövsüm üçün hazırlığı davam etdiririk. Bunu Samir Abasov da açıqlamalarında bildirib. Ola bilər ki, hansısa transferimiz “Fehervar”la oyunlara çatmasın, lakin ondan bir gün sonra komandaya qoşulsun. Transfer çalışmalarımız hər gün davam edəcək”.
Fürsət düşmüşkən Mehdi Hüseynzadə adına stadionun son durumunu da öyrəndik:
“Stadionda işlər hələ davam edir. Hər şey qaydasındadı. Xırda-para işlər qalıb. Onlar da oyun gününə qədər həllini tapacaq. Ümumiyyətlə, stadionda heç bir qlobal çətinlik yox idi. Sadəcə, kiçik məsələlər qalmışdı ki, onlar da öz axarıyla gedir”.
KAMAL SƏFƏR
