“Rəqibin o vaxtkı heyətində çıxış edən futbolçular daha tanınmış idi” – “Sumqayıt”ın kapitanı
Ölkəmizi Konfrans Liqasında təmsil edəcək “Sumqayıt” hazırlığın növbəti mərhələsi üçün Türkiyəyə yollanıb.
Samir Abasovun yetirmələri Ankaranın Qızılcahamam bölgəsində hazırlığı davam etdirəcək. İndi “kimyaçılar”ı, sadəcə, Macarıstanın “Fehervar”ıyla oyunlar maraqlandırır. Bəs kollektivin hazırlığı nə yerdədi? “Sumqayıt”ın kapitanı Vüqar Mustafayevin “Football-plus.az”a söylədikləri:
“Ayın 18-dən Sumqayıtda məşqlərə başlamışdıq. Əsasən fiziki-taktiki məşqlər keçirilir. Hazırlığı Ankarada davam etdiririk. Yəqin ki, fiziki məşqlərimizlə yanaşı, daha çox taktiki məşqlərə üstünlük veriləcək. Çünki burda Konfrans Liqasına hazırlıq məqsədiylə keçiriləcək yoldaşlıq oyunlarımız olacaq. Rəqibimizi az-çox tanıyırıq”.
29 yaşlı futbolçu iki il əvvəl “Qəbələ” ilə qarşılaşan “Fehervar”la indiki “Fehervar” arasında fərqi belə izah etdi:
“Həmin “Fehervar”la indiki arasında heyət baxımından fərq var. Fikrimcə, rəqibimizin o vaxtkı heyətində çıxış edən futbolçular daha tanınmış idi. Həmçinin həmin vaxt onların çempionatda bombardir olan hücumçusu var idi, hansı ki, indi yoxdu (Kenan Kodro – red.). Ancaq indi onun yerinə gələn Tobias Kristensen barədə məlumatımız yoxdu. Bəlkə ondan daha yaxşıdı. Ümumi götürdükdə, komanda KL-də iştirak edirsə, deməli, zəif deyil. Məşqçilər də rəqib haqda bizə az-az məlumat verir. Hələ vaxtımız var. Yəqin ki, rəqib barədə daha detallı məlumat veriləcək. Hazırda fikrimizi məşqlərə kökləmişik. İnşallah, yaxşı nəticə əldə etmək üçün əlimizdən gələni əsirgəməyəcəyik”.
Xatırladaq ki, “Sumqayıt” “Fehervar”la ilk matçı iyulun 25-i evdə, cavab görüşünü isə 31-i səfərdə keçirəcək.
KAMAL SƏFƏR
Digər xəbərlər
