“Adana Dəmirspor”dan ayrıldıqan sonra “Qarabağ”a dönüşü daim aktual olan Şahruddin Məhəmmədəliyevin transferi bu gün reallaşdı.

“Football-plus.az” xəbər verir ki, 30 yaşlı qapıçı bir il Ağdam təmsilçisinin heyətində çıxış edəcək. Onsuz da Amin Ramazanovun 8 ay yaşıl meydanlardan kənarda qalacağından, “köhlən atlar”ın yeni qolkiper transfer etməsi labüd idi. Belədə klub rəhbərliyi seçimini Şahruddindən yana etdi. Fəqət klubun bu transferini azarkeşləri heç də xoş qarşılamadı. “Qarabağ”ın sosial şəbəkə hesablarında transferi elan etməsindən sonra izləyicilər onun haqda fikirlərini bölüşdülər.

Pakizə Qasımova: “Sizə tam olaraq neçə milyon ziyan dəyməlidi ki, Şahruddinin bu komandaya uyğun olmadığını başa düşəsiz?!”.
Fərid Pərdəşünas: “İkinci heyət və liqamız üçün yaxşıdı. Məncə, əsas hədəf də elə budu. Amma yenə də insanın içinə düşmənə güvən, dosta qorxu verən hisslər gəlir”.
Elçin Əhmədzadə: “Əsl qəlbidaş gəldi”.
Kamran Şeyxzamanlı: “Ondansa qapıçısız oynayın”.
İskəndər Nəbiyev: “Deməli, azarkeşləri ciddiyə almadız. Bir “Neftçi”yə baxın. Səlahət Ağayevlə razılaşdılar, ancaq azarkeşlərin etirazına görə transfer etmədilər. Bu, azarkeşlərə hörmətsizlikdi”.
Murad Əzizov: “Şahruddinin gəlişinə sevindim. Onun önəmli seyvlər etdiyi oyunları da unutmayaq. Bu, indiki zamanda ən yaxşı variantdı və Şahın özünü doğruldacağına inanıram”.
Furqan Sadıqov: “Şahruddin pis qapıçı deyil. Hərdən etdiyi səhvlər olmasa, əjdaha kimidi. Topu oyuna daxil etməkdə çətinlik çəkir. Bunun üzərində işləmək lazımdı. Ümid edirəm ki, əsas qapıçı olmayacaq. İkinci qapıçı kimi çıxış edəcək”.
Oruc Əlimərdanlı: “Xoş gəldin, Konfrans Liqası”.
Yusif Xəlilov: “Yenə başlayaq valerian (ürək dərmanı) almağa”.
Turan Yunus: “Yoldaşlar, vacib oyunlarda əsas qapıçı kimi oynadılacaqsa, xahiş edirəm: bütün fanatlar bir olaq və “Qarabağ”ın baş ofisi qarşısında etiraz edək. Mən nə öz sağlamlığımı, nə də “Qarabağ”ın yenidən milyonlar itirməsini istəmirəm”.
Fərid Həsənov: “Avrokuboklar başlamadan bitdi”.
Oruc Piriyev: “Çoxdan əsəbləşmirdik, gəl, çıx da”.

KAMAL SƏFƏR