Yəqin ki, “Qarabağ”ın ikinci qapıçısı Amin Ramazanovun 8 aylığa yaşıl meydanlardan kənarda qalacağından xəbərdarsız.

Avstriyanın Tirol bölgəsində təlim-məşq toplanışını davam etdirən son çempionun qolkiperi elə məşq zamanı çarpaz diz bağlarının qopması səbəbindən uzun müddət qazonun ətrindən uzaq duracaq. Belədə yenə görünən odu ki, Ağdam təmsilçisi “çərçivə” sarıdan əziyyət çəkəcək. Onsuz da uzun illərdi klubun ən yaralı yeri budu. İbrahim Şehiçdən bəri komandanın “çərçivə”ni etibar etdiyi qapıçıların bir çoxu “Qarabağ”a lazım olandan daha artığını edə bilmir. İstər dünyaca tanınmış Asmir Beqoviç olsun, istərsə də də Şahruddin Məhəmmədəliyev. Elə sonuncu mövsümdə “köhlən atlar”ın şərəfini qoruyan Andrey Lunyov da bu siyahıya daxildi.

Doğrudu, müəyyən özəlliklər var. Məsələn, Lunyov daha sabit oyunçudu. Çünki onun qapıda olması o demək idi ki, adi zərbələrin qol olmaq ehtimalı azdı. Təəssüf ki, bu sabitliyi “Bayer-04”lə oyunlarda göstərə bilmədi. Şahruddin isə tam fərqli üslubda çıxış edən qapıçıdı. Bəlkə də onun dəf etdiyi yüzdəyüz qol imkanlarının qarşısını bir çox qapıçı ala bilməzdi. Ancaq səhvlərinə görə də tayı-bərabəri tapılmazdı. Bu üzdən də ona güvənmək olmurdu. Hər an hansısa səhv edəcəkmiş kimi komanda yoldaşları da istədiyi rahatlığı özlərində tapa bilmirdilər. Kəsəsi, daim Avropada çıxış edən, yüksək hədəflər uğrunda mübarizə aparan “Qarabağ”ın etibarlı qapıçı məsələsi bu vaxta qədər həllini tapmamış görünür. Doğrudu, yay fasiləsində klub Fabiyan Buntiçin transferini reallaşdırdı. Bəlkə də xorvat əsilli almaniyalı qolkiper komandaya lazım olan güvəni sağlayacaq. Lakin bu vaxta qədər onun heç bir oyunun görmədiyimə görə yaxşı və ya pis nəsə deyə bilmirəm. Ancaq atalarımızın bir məsəli var: şər deməsən, xeyir gəlməz. Qoy elə Buntiç çox yüksək səviyyəli, “çərçivə”də güvən bəxş edən qapıçı olsun. Fəqət onun da mövsüm sonuna kimi zədələnməyəcəyini və ya mövsümün yarısında daha yaxşı təklif qarşılığında Ağdam təmsilçisindən ayrılmayacağını nə biləsən?

Belədə komandanın qapısını 19 yaşlı Sadiq Məmmədzadə qorumalı olacaq. Bu isə futbolçuların daha da ehtiyatlı çıxış etməsinə və bu üzdən də basqı altında mübarizə aparmasına yol açacaq. Məqsədim gənc qolkiperi ruhdan salmaq deyil. Amma “Qarabağ” səviyyəsində bir klubun daha üst səviyyədə çıxış edə biləcək qapıçıya ehtiyac duyduğu aşkardı. Yəqin ki, artıq bu istiqamətdə seleksiya işləri davam etdirilir, müəyyən təhlillərdən sonra ictimaiyyətə qərar açıqlanacaq. Ancaq ictimaiyyəti narahat edən daha bir məsələ “Adana Dəmirspor”dan ayrılan və hazırda işsiz olan Şahruddinin komandaya mümkün dönüşüdü. Ki, belə məqamda bir çox futbol adamının nəinki Şahruddinin, ondansa elə Sadiqin qapını qorumasına tərəfdar olacağına əminəm. Millimizin əsas qapıçısının seyvlərinə söz ola bilməz. Lakin qəfil səhvlərlə bütün gözəl qurtarışlarının üzərindən çalın-çarpaz xətt çəkir. Hər halda, ümid edək ki, skautlar etibarlı qapıçı tapacaq, komanda isə Çempionlar Liqasının oyunlarında daha arxayın şəkildə meydana çıxacaq.

KAMAL SƏFƏR