"Zirə” bu gün Avropa Liqasının 1-ci təsnifat mərhələsində “Şerif”i qəbul edəcək. Bu oyunun start fiti saat 20.00-da səslənəcək.

Bilindiyi kimi, “qartallar” səfərdən sərfəli nəticəylə qayıdıb – 1:0. İndi azarkeşləri narahat edən məqam rəqibin Mərdəkanda mərhələni adlamaq ehtimalıdı. Bəs bu nə dərəcədə real görünür?

“Şerif”in hücum xəttinə nəzər salaq. Tiraspol klubunun UEFA-ya təqdim etdiyi iştirak ərizəsində beş hücumçu var: Acak Riak, Jerom Mbekeli, Danila Forov, Əyyub Allaş, Raşed Akanbi.

Acak Riak – ilk matçda 70-ci dəqiqədə meydana çıxdı. Bəli, onun meydandakı varlığını hiss etmədik. Ötən mövsümü İndoneziya “Sleman”ında keçirən hücumçu şans verilən 14 matçda 5 qol vurmağı bacarıb. Tiraspollular onu bu ay alıb ki, hələ faydasını görməyib. Riak nə yoxlama oyunlarında özünü yaxşı tərəfdən göstərib, nə də məşqlərdə.

Jerom Mbekeli – 83-cü dəqiqədən iş başında olan futbolçu nə qol vurdu, nə də komandasına düşərli oldu. O, Volkovun qoluna üzülməklə kifayətləndi. Ötən “futbol ili”ndən “Şerif”də çıxış edən hücumçu 32 matçda 6 qol, 9 məhsuldar ötürmə ilə yadda qalıb. Çempionlar Liqasından məhrum olduğundan ruhdan düşdüyü iddia edilən futbolçu özünü toparlaya bilmir.

Danila Forov – “Zirə” ilə matçda ehtiyat oyunçular skamyasında qaldı. 2023/24 mövsümündən Moldova klubunun formasını geyən oyunçuya cəmi 8 oyunda güvənilib ki, bəhrə 2 qol olub. Ümumiyyətlə, Forov start heyətinin aparıcı üzvü deyil.

Əyyub Allaş – start heyətində yer almışdı. Yuri Qura onun “qartallar”ı tanıdığını düşündüyündən bilgisindən yararlanmaq istəyirdi. Lakin yanıldı. Allaş cəmi bir dəfə bəxtini sınamaq istəsə də, Renatonun yekəpər cüssəsi və cəld müdaxiləsiylə üzləşdi. Hər halda, Rəşad Sadıqov Əyyubun “Zirə”nin yox, “Şerif”in təklifini qəbul etməsinə sevinə bilər. Çünki ötən mövsüm “Qəbələ”nin heyətində meydana çıxdığı 40 oyunda 7 qol, 10 məhsuldar ötürməylə diqqəti çəkən Allaş həminki deyil.

Raşed Akanbi – “qartallar”a qarşı 70 dəqiqə tər töksə də, istəyinə çatmadı. Baxmayaraq ki, hücum xəttinin ən fəalı idi. Akanbi ötən “futbol ili”ndə də xoşbəxt olmayıb. Ağır zədə üzündən aylarla meydana çıxa bilməyən hücumçuya 12 matçda şans verilib, 4 qol, 2 məhsuldar ötürmə ilə yadda qalıb. Əvvəlki performansına qayıtması üçün uzun vaxt lazımdı.

Bəli, Yuri Qura hücum xəttinin durumunu bildiyindən “Zirə”ni 5:3 yox, 1:0 hesabıyla udmağa üstünlük verirdi. Bunu “doğma divarlar” arasında bacarmayan “Şerif”in səfərdə üstün olması möcüzə kimi görünür.

KƏNAN BAHADIR