“Zirə” bu gün Avropa Liqasının 1-ci təsnifat mərhələsində cavab matçına çıxacaq.

"Football-plus.az" xəbər verir ki, rəqibi “Şerif”i ilk oyunda minimal hesabla məğlub edən “qartallar” (1:0) evdə növbəti mərhələ uğrunda “qanad çırpacaq”. Təmsilçimizin avrokuboklar həyəcanı həmişə olduğu kimi, “CBC Sport”da yaşanacaq.

Avropa Liqası
1-ci təsnifat mərhələsi, cavab oyunu
Zirə - Şerif (Moldova) 1:2 (pen. 4:5)
Rafael Utziq, 5 - Əyyub Allaş, 54. Papa Yade, 77.
Qırmızı vərəqə: Salifu Suma, 40.
Hakimlər: BULAT SARİYEV, Denis Labaşov, Yuri Tixonyuk, Aydın Tasıbayev (hamısı Qazaxıstan).
18 iyul. Bakı. “Liv Bona Dea Arena”. Saat 20.00.
İlk oyun - 1:0.

“Şerif” ev oyununda “Zirə”yə məğlub olmaqla 2-ci təsnifat mərhələsinə adlamaq yolunda şanslarını xeyli azaltdı. Bu, “qartallar”ın perspektivini yaxşı görən təxəyyülümüzün məhsulu yox, həm də moldovalı futbol adamlarının yanaşmasıdı. Bəli, tiraspollular nəinki “doğma divarlar” arasında keçirilən matç üçün, ümumiyyətlə, cütün favoriti kimi göstərilirdi. Çoxu bu klubun maliyyə problemləri içində çabaladığını bilsə də, ən azı ad-sanı naminə uğur qazanacağını düşünürdü. Hər halda, hadisələrin axarı Yuri Quranın komandasına mənfi təsirini göstərib. Tiraspolluların durumu əvvəlkindən fərqlənir. İki futbolçu məğlub olduğu gündən bəri həm yerli, həm də xarici mətbuatın təzyiqinə məruz qalan komandadan ayrılıb. Kollektiv hələ ki, sadəcə, 19 yaşlı nigeriyalı yarımmüdafiəçi Gideon Uçe Qudladla anlaşıb.

Qeyd edək ki, İsveçin “Fotboll Sthm” nəşri “Zirə”nin “Şerif” üçün uyğun rəqib olduğunu düşünənlərin yanıldığını tirajlayıb. Hətta həmkarlarımızın komandanın bu mövsüm avrokuboklarla erkən vidalaşacağını qeyd edir. Moldovalı jurnalistlər də bu yöndə ümidli deyil. Əlbəttə, qeyd olunanlar “Zirə”nin Tiraspol klubunu şəksiz üstələdiyi və ya cavab matçının aşkar favoriti olduğu anlamına gəlmir. Sadəcə, “Şerif”in keçdiyi ağır dönəm “qartallar” üçün yaxşı fürsət yaradıb. Bu üzdən bizimkilər həm arxayınlaşmamalı, həm də fürsətdən maksimum yararlanmalıdılar. Necə deyərlər, ipin ucunu əldən vermək olmaz.

“Zirə” yə gəlincə, komandada əhval-ruhiyyənin yüksək olduğu haqda məlumat əldə etmişik. Yəni vacib oyun ərəfəsində psixoloji durum qaydasındadı. Hansısa futbolçu da zədədən əziyyət çəkmir. Son ana qədər bəxtsizlik üz verməsə, Rəşad Sadıqov ilk matçdakı kimi bütün futbolçuların xitdmətindən yararlanmaq hüququna malik olacaq. Baş məşqçinin bu matçda aşağıdakı futbolçulara şans verəcəyini təxmin edə bilərik:

Tyaqo Silva, Ruan Renato, Stefan Aka, Salifu Suma, Rüstəm Əhmədzadə, Pyer Zebli, Rafael Utziq, Eldar Quliyev, Qismət Alıyev (k), İssa Cibrilla, Davit Volkov.

Bilindiyi kimi, Ceyhun Nuriyev səfər matçında həddən artıq zəif performansla diqqəti çəkdi. Bu üzdən, onun cavab oyununun start heyətində yer alacağına şübhəylə yanaşmaq olar. “Şerif”in oyun tərzi və heyətində isə daha ciddi dəyişikliklərin olacağı güman edilir. Hər halda, Yuri Qura “qartallar”ın müdafiə xəttinin gücünü gördü. Mərhələni adlamaq istəyirsə, hücum cəhdlərinin daha “yırtıcı” olmasına diqqət yetirməlidi. Belədə ortaya aşağıdakı start heyəti çıxa bilər:

Viktor Straistari, Joao Paulo Fernandes, Sedrik Badolo, Mussa Kyabu (k), Mateus Lins, Əyyub Allaş, Yoselin Beyratş, Raşed Akanbi, İlunqa İseya Pata, Acak Riak, Pata Yade.

İş orasındadı ki, “Şerif”in həm də hücum xəttində ciddi problemlər var. Komanda bu mövqe üçün Riak, Mbekeli, Forov, Allaş və Akanbi kimi təcrübəli futbolçulara sahib olsa da, onların heç biri ötən mövsüm fövqəladə uğur qazanmayıb. Hələ bizə tanış olan Allaşın son klubu “Qəbələ”nin 1-ci liqaya düşməsi, ümumiyyətlə, tiraspolluların belə hücumçularla güclənməyə çalışması durumun nə qədər vahiməli olduğundan xəbər verir. Deməli, ümid bəsləyə bilərik. Özü də doyunca!

Yeri gəlmişkən, matçın biletləri satışdadı. Qiymət sektorlara əsasən müvafiq olaraq 2, 5, 10, və 20 manat təşkil edir. Satış məntəqələri isə Zirə İdman Kompleksinin, “Liv Bona Dea Arena” və Tofiq Bəhramov adına Respublika stadionunun kassalarıdı.

KƏNAN BAHADIR