Bəli, Avropa Liqasının 1-ci təsnifat mərhələsi çərçivəsində “Zirə”nin Bakıda “Şerif”ə qarşı keçirəcəyi cavab oyununun hakimləri bəllidi. İyulun 18-də “Liv Bona Dea Arena”da baş tutacaq matçı qazaxıstanlı hakimlər briqadası idarə edəcək. Baş hakim Bulat Sariyevə yan xətt hakimləri Denis Labaşov və Yuri Tixonyuk kömək edəcək. Dördüncü hakim funksiyasını isə Aydın Tasıbayev yerinə yetirəcək.

Bilindiyi kimi, bu matçın nəticəsinə əsasən, komandalardan biri turnirin növbəti təsnifat mərhələsində iştirak hüququ qazanacaq. Bu baş versə, “Zirə” 7 il əvvəlki uğurunu təkrarlayacaq. Qısası, Avropa Liqasının 2017/18 mövsümünün 1-ci təsnifat mərhələsində “Differdanj”ı mübarizədən kənarlaşdıran “qartallar” bu dəfə “Şerif”i məyus edə bilər. Əlbəttə, bu, həm də matçın nə dərəcədə ədalətli idarə olunacağından asılıdı. Belədə ədalət təmsilçisinin çiyinləri üstünə yük düşür ki, bu dəfə məsuliyyəti Bulat Sariyev daşıyacaq. Onunla "football-plus.az"ın ənənəvi hakim təqdimatında tanış olaq.

Bulat Sariyev... “Fit sahibi”nin ölkəmizlə tanışlığı heç də xoş təəssüratlarla xatırlanmır. O, millimizin futbol ictimaiyyəti önündə rəzil olduğu matçlardan birinin canlı şahidi olub. Lakin hadisələri qabaqlamayaq və tanıtmaya əvvəldən başlayaq.

32 yaşlı ədalət təmsilçisi Qazaxıstanın Uralsk şəhərində dünyaya gəlib. 2010/11 mövsümündən bəri “qara paltar” geyən Sariyev ölkəsinin premyer-liqa və kubok matçlarında ədaləti qorumağa başlayıb. Elitada 64 matç idarə edən hakim 324 sarı, 19 qırmızı vərəqə göstərib. Qazaxıstan Futbol Federasiyası 17 kubok matçında ona güvənməyi lazım bilib. Sariyev 2016/17 “futbol ili”ndən bəri beynəlxalq arenalarda meydana çıxır. Belədə onun indiyə qədər xeyli təcrübə sahibi olduğunu düşünmək olardı. Əfsuslar olsun ki, belə deyil. Daha dəqiqi, referinin karyerası zənginliyi ilə seçilmir. O, Avropa Liqasının təsnifat mərhələsində 1, beynəlxalq yoldaşlıq oyunlarında 3, Gənclər Liqasında 4, Konfrans Liqasının təsnifat mərhələlərində 2 dəfə meydana çıxıb. Digər şanslarını isə 17 və 21 yaşadək futbolçular arasında Avropa Çempionatı matçlarında dəyərləndirib.

Bulat bəy karyerasında ilk dəfə klublarımızdan biri üçün ədaləti qorumağa çalışacaq. Amma yuxarıda qeyd olunduğu kimi, millimizlə bağlı pis xatirəsi var. Belə ki, o, U-21 yığmamızın AÇ-2019-un seçmə mərhələsində “Liv Bona Dea Arena”da almaniyalı həmyaşıdlarına 0:7 hesabıyla uduzduğu qarşılaşmada dördüncü hakim olub. Həmin matçda yığmamızın heyətində meydana çıxan Qismət Alıyev indi “Zirə”nin kapitanıdı. Ümid edirik ki, illər əvvəl üzü qızaran futbolçu bu dəfə komandasıyla birgə, yenə Sariyevin gözləri önündə və həmin stadionda sevinəcək...

Sözügedən hakimin böyüklərdən ibarət milli komandalar arasında ilk oyunda debütü isə ötən ilə təsadüf edib. Söhbət AÇ-2024-ün seçmə mərhələsində keçirilən Belarus – Andorra (1:0) matçından gedir.

Ümumiyyətlə, Sariyev karyerasına ərzində 101 matç idarə edib. Referi bu oyunlarda 488 sarı, 23 qırmızı vərəqə göstərib.

KƏNAN BAHADIR