“Kəpəz”in transfer etmək niyyətində olduğu Redon Mihana ilə danışıqları dayandırdığını yazmışdıq. Xatırladaq ki, buna maddi yöndə anlaşmazlıq səbəb olmuşdu.

“Football-plus.az”ın əldə etdiyi məlumata görə, klubla Mihana arasında danışıqlar bərpa olunub. Belə ki, “sarı-göylər” legionerin tələb etdiyi məbləği ödəmək qərarına gəlib.

Niyə? Çünki Gəncə təmsilçisi tezliklə maliyyə dayaqlarını gücləndirəcək. Etibarlı mənbənin verdiyi məlumata görə, klub yeni sponsorla anlaşıb. Lakin yeni maddi gücün irimiqyaslı olduğunu desək, yanılarıq. Qısası, sponsor “Kəpəz”i böyük ölçüdə olmasa da, müəyyən xırda xərclərdən xilas edəcək.

Qeyd edək ki, Mihana “Laçi”nin yetirməsidi. 25 yaşlı sol cinah müdafiəçisi karyerası ərzində “Apolloniya”, “Dinamo”, “Eqnatiya”, “Kastrioti” və sonuncu dəfə “Erzeni”nin (hamısı Albaniya) formasını geyib. Futbolçuya 2023/24 mövsümündə bütün turnirlər üzrə 36 oyunda şans verilib. Belədə Mihana 6 qol, 2 məhsuldar ötürməyə imza atıb. “Transfermarkt” ona 200 min avro qiymət qoyub.

KƏNAN BAHADIR