Yeni mövsümə hazırlığı davam etdirən “Kəpəz” dörd legioner transfer edib.

“Football-plus.az” sizi Gəncə təmsilçisinin yeni simalarıyla tanış edir.

Lassana Ndiaye – 180 sm boya malik mərkəz hücumçusu Mali millisinin sabiq üzvüdü. Futbolçudan sol cinah müdafiəçisi kimi də faydalanmaq mümkündü. O, karyerası boyunca ÇSKA, “Tekstilşik” (hər ikisi Rusiya), “Arda” (Bolqarıstan), “Radniçki” (Serbiya) kimi tanınmış klublarda çıxış edib. Lassananın sonunu komandası “Botev”di. Hücumçu bu kollektivin heyətində bütün turnirlər daxil olmaqla 12 matçda meydana çıxıb, 1 qola müəlliflik edib. “Transfermarkt”a görə, onun qiyməti 200 min avrodu.

Kərim Lkoça – 23 yaşlı sağ cinah hücumçusu “Damm”ın (İspaniya) yetirməsidi. O, indiyə qədər “Gimnastik”, “Pobla de Mafumet”, “Jirona”, “Terrassa” (hamısı İspaniya) və sonuncu dəfə “Santa Koloma”nın (Andorra) şərəfini qoruyub. Lkoça 2023/24 “futbol ili”ndə 3 oyunda meydana çıxıb, 1 qolla yadda qalıb. “Transfermarkt”a görə, hücumçunun dəyəri 350 min avrodu.

Redon Mihana – 25 yaşlı sol cinah müdafiəçisi 185 sm boya malikdi. O, Albaniyanın U-21 millisinin sabiq üzvüdü. “Laçi”nin yetirməsi karyerası ərzində “Apolloniya”, “Dinamo”, “Eqnatiya”, “Kastrioti” və sonuncu dəfə “Erzeni”nin (hamısı Albaniya) formasını geyib. Futbolçuya 2023/24 mövsümündə bütün turnirlər üzrə 36 oyunda şans verilib. Belədə Mihana 6 qol, 2 məhsuldar ötürməyə imza atıb. “Transfermarkt”a görə, onun dəyəri 200 min avrodu.

Roqeyro Santos – 25 yaşlı qapıçı 189 sm boya malikdi. O, Portuqaliyanın U-20 yığmasının keçmiş üzvüdü. “Braqa”nın yetirməsi “Torfense”, “Feirense” və son olaraq “Lank” kimi (hamısı Portuqaliya) klubların heyətində çıxış edib. Qolkiperin legioner həyatı yaşayacağı ilk ölkə Azərbaycan olacaq. 2023/24 “futbol ili”ndə 29 matçda “çərçivə”ni qoruyan qapıçı 46 qol buraxıbsa, 4 “quru” oyun keçirib. “Transfermarkt”a görə, qolkiperin qiyməti 325 min avrodu.

Qeyd edək ki, futbolçular komandaya azad agent statusuyla qoşulacaq və hər biriylə birillik müqavilə imzalanacaq.

KƏNAN BAHADIR