Tyaqo Alkantara karyerasını başa vurur

İspaniya yığmasının və “Liverpul”un sabiq yarımmüdafiəçisi Tyaqo Alkantara karyerasını başa vurmaq qərarına gəlib.

Bu barədə italiyalı futbol insayderi Fabritsio Romano sosial şəbəkədə yazıb. Onun sözlərinə görə, 33 yaşlı ispaniyalı futbolda başqa rolda təmsil olunacaq. Daha öncə mətbuatda Tyaqonun Hans-Diter Flikin “Barselona”dakı məşqçilər korpusunda yer ala biləcəyi barədə məlumatlar yayılmışdı. Xatırladaq ki, Alkantaranın sonuncu klubu 2020-ci ildən çıxış etdiyi “Liverpul” olub.

Ötən mövsümü zədə üzündən buraxmalı olan futbolçu dörd il ərzində “qırmızılar”ın heyətində 98 oyuna çıxıb və 3 qol, həmçinin 6 məhsuldar ötürmə ilə fərqlənib. Daha əvvəl “Bavariya”da və yetirməsi olduğu “Barselona”da forma geyib, hər iki klubun heyətində Çempionlar Liqasının qalibi olub.