Premyer-liqanın 26-cı turunda da hakimlik müzakirə mövzusu oldu.

"Football-plus.az" xəbər verir ki, Gəncədə keçirilən qarşılaşmada meydan sahiblərinin qapısına təyin olunan penalti ətrafında çox danışıldı.

“Sabah”ın baş məşqçisi Murad Musayev “Sumqayıt”la matçdakı idarəçilikdən şikayət etməsə də, mövsümboyu ədalət təmsilçilərinin ədalətsiz qərarlarına görə çox əziyyət çəkdiklərini bildirdi.

Şamaxı - Neftçi, FƏRİD HACIYEV
Baş hakim ilk dəqiqələrdən sürətli, baxımlı futbola şərait yaratdı. Oyunu yersiz saxlamırdı. Ofsayd epizodlarının hər biri düzgün idi. Oyunda əsas müzakirə mövzusu 3-cü dəqiqədə yaşandı. "Şamaxı"nın künc zərbəsindən sonra top Eddi İsrafilovun qoluna dəydi. Meydan sahibləri penalti tələb etsə də, hakim davam dedi, VAR otağından da müdaxilə olmadı. Hər iki hissədə İsrafilov olduqca sərt və kobud müdaxilələrlə diqqəti çəkirdi. Üç epizodda yığma üzvü aşkar kobudluq etsə də, Fərdi Hacıyev yalnız 62-ci dəqiqədə ona rəsmi xəbərdarlıq etdi. 56-cı dəqiqədə Vato Arveladzenin simulyasiya etməsi də referinin gözündən yayınmadı və gürcünü “sarı” ilə "mükafatlandırdı”. Ümumilikdə baş hakim cəmi üç dəfə əlini cibinə atdı. Vərəqələrin hamısı da qonaq komandanın futbolçularına göstərildi. "Şamaxı" bu matçda yalnız baxımlı futbolu ilə yox, həm də intizamıyla yadda qaldı.

Qarabağ – Səbail, RƏVAN HƏMZƏZADƏ
Oyunun baş hakim və köməkçiləri üçün asan keçdiyini söyləmək olar. Bu da komandalar arasındakı səviyyə fərqindən irəli gəlirdi. Köməkçiləri ilə yaxşı anlaşan Həmzəzadə mübarizənin axarına müdaxilə etmir, epizodlara yaxın olmağa çalışırdı. İkinci hissədə Bəhlul Mustafazadə ilə toqquşan Adil Nağıyev yerdə qalsa da, Həmzəzadə oyunu davam etdirdi. Referi bu qərarında da haqlı idi. Çünki “Səbail”in müdafiəçisinə qarşı kobudluq olmamışdı.

Kəpəz – Zirə, KAMRANBƏY RƏHİMOV
Gəncədəki oyunda maraqlı hadisələr cərəyan etdi. Matçın əvvəllərində Kamranbəy Rəhimov ciddi mövqe səhvlərinə yol verirdi ki, bu səbəbdən onun qərarlarına hər iki baş məşqçi etiraz edirdi. Hətta bir epizodda top bakılılardan yan xətdən çıxsa da, referi fərqli qərar verdi. Bu zaman Tərlan Əhmədov əli ilə göyü göstərib "Allahınız olsun", - deyə üsyan etdi. Ən qalmaqallı hadisə isə penalti epizodu zamanı yaşandı. 80-ci dəqiqədə Giorgi Kantariyanın müdaxiləsindən sonra Rəhim Sadıxov yerdə qaldı. Baş hakim 11 metrlik cərimə zərbəsi təyin etdi. Oyundan sonra keçirilən mətbuat konfransında Tərlan Əhmədov penaltinin olmadığını, 3 xallarının əllərindən alındığını dilə gətirdi. Bu məqamla bağlı qərar vermək o qədər də asan deyil. Toxunuşun olduğu və Rəhimin də özünü yer atdığı görünür. Hətta mütəxəssislər və AFFA Hakimlər Komitəsi də bu qərarı şərh etməkdə çətinlik çəkir.

Turan Tovuz - Qəbələ, RAUF CABBAROV
Matçın iki vacib məqamında hakimlər səhv qərar verdi. Meydan sahiblərinin penalti epizodu zamanı referi matçı davam etdirmişdi. Lakin VAR hakimi Cavid Cəlilov penalti təyin etdi. "Qəbələ"nin vurduğu qol zamanı oyundankənar vəziyyət qeydə alınmışdı. Bu dəfə də VAR-dan gələn siqnaldan sonra Rauf Cabbarov fikrini dəyişdi və qol qeydə alındı. Ümumilikdə bu səhvlər onun matça tam hazır olmamasının göstəricisidi.

Sabah – Sumqayıt, TURAL QURBANOV
Texniki səbəblərdən VAR sisteminin işləmədiyi matçda hakimlər briqadasının bəxti gətirdi ki, mübahisəli epizod yaşanmadı. Ümumilikdə isə 4 qolun vurulduğu oyunda hakimlik diqqət mərkəzinə düşmədi. Yetərincə sürətli, qarşılıqlı hücumlar şəraitində keçən 90 dəqiqədə Tural Qurbanov oyunun “ip”ini əldən vermədi ki, bunu da onun adına müsbət məqam kimi yazmaq olar. Start fitindən öncə gənc referi hər iki komandanın baş məşqçisinə yaxınlaşaraq təmkinli olmalarını istədi, narazı qaldıqları epizoda görə dördüncü hakimlə dialoqa girə biləcəklərini söylədi. Xırda metodiki səhvləri nəzərə almasaq, hakimlər brqadası nəticəyə təsir edən səhvlərə yol vermədi.