“Səbail” növbəti mövsüm üçün stategiyasını açıqlayıb.

Maliyyə məhdudiyyəti ilə üzləşən “dənizçilər” bir neçə aparıcı futbolçu ilə yollarını ayırıb. Bu yaxınlarda düşərgəni tərk edənlərdən biri də Adi Mehremiç oldu. Ötən yay “dənizçilər”ə qatılan bosniyalı müdafiəçi sosial şəbəkə hesabında “vidalaşmıram, görüşənə qədər deyirəm” kimi maraqlı paylaşım edib. Bu isə azarkeşlər arasında onun yenidən Azərbaycanda oynayacağı kimi yorumlanıb. Dünən Adi ilə əlaqə saxladıq, “Səbail” və Azərbaycan ilə bağlı düşüncələrini öyrəndik.

- “Səbail”dən ayrıldız. Əvvəlcə soruşmaq istərdim ki, niyə belə qərar verdiz? “Səbail”dəki maliyyə sıxıntısı bu qərara nə dərəcədə təsir etdi?
- Bəli, “Səbail”dən ayrıldım. “Səbail”də çox gözəl vaxt keçirdim. İdman direktoru ilə dərin söhbətim oldu. Mənə klubdakı maliyyə vəziyyətini izah etdilər. Ona görə də qərara gəldik ki, maliyyə vəziyyəti ilə bağlı kluba getməklə kömək etməliyəm.

-  Sağollaşanda "görüşənə qədər" mesajını göndərdiz. Bəziləri bunu yenə də Azərbaycanda oynayacağınla əlaqələndirib. Niyə belə mesaj?
- Dediyim kimi, “Səbail”də və Azərbaycanda çox gözəl vaxt keçirdim. Oğlum Bakıda anadan olub, ona görə də ailəmin və  mənim Azərbaycan ilə ömürlük əlaqəmiz var. Sponsorla bağlı yaranmış vəziyyətə görə ayrıldım. Bəlkə gələcəkdə “Səbail”ə qayıda bildim.

- “Səbail” mövsümün sonunda avrokuboklara qatılmaq şansını itirdi. Bu nəticəyə görə baş məşqçi və futbolçular da günahlandırılır. Özündə səhv görürsənmi?
- Futbol bir şirkət deyil ki, sərmayə qoyasan və dərhal məhsul götürəsən. Bu mövsüm yaxşı komanda qurduq, avrokuboklara vəsiqə uğrunda, demək olar ki, sona qədər mübarizə aparırdıq. Məncə, bu, bizim uğursuzluğumuz deyil. Gələn mövsüm bu heyət və futbolçular ilə qalsaydıq, 100 faiz ilk “4-lük”də qərarlaşardıq.

-  Ümumiyyətlə, klubda nəyi fərqli görmək istərdin? Səncə, “Səbail” başqalarıyla müqayisədə necə səviyyədədi?
- Düzünü desəm, klub hər seqmentdə yüksək səviyyədədi. Baş direktor, idman direktoru, məşqçilər heyəti, komanda yoldaşlarım... Ötən mövsüm hər şey yüksək səviyyədə idi. Sadəcə, sponsor səbirli olmalı və növbəti mövsümləri gözləməliydi ki, nəzərəçarpan nəticələr əldə edə bilək.

- Azərbaycan premyer-liqasının səviyyəsini necə görürsən? Növbəti mövsümdə əcnəbi məşqçilərin gəlişi ilə hansı dəyişiklikləri gözləyirsən?
- Liqa maraqlıdı. “Qarabağ”, heç şübhəsiz, ən yaxşı komandadı. Amma digər komandalar da pis deyildi. Düşünürəm ki, premyer-liqa gündən-günə böyüyəcək. Əcnəbi məşqçilər azərbaycanlı məşqçilərdən çox fərq etməyəcək. Amma mən daha çox insanın stadionda olmasını istərdim. Azərbaycanda adamlar futbola Avropadakı və Türkiyədəki qədər maraq göstərmirlər.

- Karyeran ərzində müxtəlif ölkələrin 20-yə yaxın klubunda çıxış etmisən. Azərbaycan futbolu, onun mentallığı və başqa cəhətləri haqqında nə deyərdin?
- Dediyim kimi, səviyyə pis deyil, getdikcə yaxşılaşır. Amma stadionda daha çox insana ehtiyacınız var.

- “Qarabağ” bizi ötən mövsüm Avropada yetərincə tanıtdı. Ölkənizdə Azərbaycan futbolunu, klublarını tanıyan varmı?
- Bəli, ötən mövsüm hamı “Qarabağ”ı izləyirdi. Bosniyada, Polşada, Türkiyədə... Hamı onların oyunlarından, xüsusən də “Braqa” və “Bayer-04” ilə oyunlarından təsirləndi.

- Avrokuboklarda ölkəmizi “Qarabağ”la yanaşı, “Sabah”, “Sumqayıt” və “Zirə” təmsil edəcək. Avropa futboluna bələd olan futbolçu kimi bu komandaların şansını necə görürsən?
- Düşünürəm ki, “Qarabağ” bu mövsüm yenidən Avropada yaxşı çıxış edəcək. Ümid edirəm ki, Çempionlar Liqasına yüksələcəklər. Digər komandalar haqda heç nə deyə bilmərəm. Bir qədər şans da lazımdı. Amma bütün klublara Azərbaycan futbolunu ən yaxşı şəkildə təmsil etmək üçün uğurlar arzulayıram.

- Hazırda Azərbaycan klubları ilə danışıq aparırsanmı, hansısa klubla anlaşman var, ya yox? Planlarını bilmək istərdim.
- İndi ailəmlə birlikdə Bosniyadayam. Hər gün məşq edirəm. Özüm və ailəm üçün ən yaxşı təklifin olacağını gözləyirəm. Düzünü desəm, karyeramı və həyatımızı orda davam etdirmək üçün Azərbaycanda qalmaq istərdik.

RÖYANƏ OĞUZ