“Zirə” sabah Avropa Liqasının 1-ci təsnifat mərhələsində “Şerif”in qonağı olacaq.

“Football-plus.az” xəbər verir ki, rəqibin baş məşqçisi Yuri Qura oyunöncəsi mətbuat konfransında jurnalistlərin suallarını cavablayıb. Onun oyun haqda fikirləri belədi:

- Oyun “Şerif” üçün çox vacib əhəmiyyət daşıyır. Bu, sadəcə, meydançada deyil, gələcəyimizi qura bilmək üçün psixoloji cəhətdən tam hazırlaşmalı olduğumuz imtahandl. Əvvəl özümüzə, sonra isə bütün matçlarda qalib gəlməliyik. “Zirə”yə gəlincə, layiqli və səviyyəli rəqibdi. Bilindiyi kimi, bu, karyeramdakı ilk Avropa Liqası matçıdı və uğurlu olmaq istəyirəm.

– Sabah meydanda adi “Şerif” görəcəyik, yoxsa xüsusi nəsə hazırlamısız?
– Əsla matçın adi olduğunu deyə bilmərəm. Həyəcanlıyıq. İndiyə qədər gördüyümüz işlərin boş olmadığını sübut etmək istəyirik. Gücümüzü göstərmək niyyətindəyik.

– Heyətdəki dəyişikliklərlə bağlı nə deyə bilərsiz?
– Məncə, yeni gələnlər komandaya çox yaxşı uyğunlaşıb. Düzdü, hazırlıq prosesi üçün arzuladığımız vaxt yox idi. Lakin futbolçular kifayət qədər səviyyəlidi və onlardan nə istədiyimi bilirlər. Düşünürəm ki, çalışıb yaxşı nəticə qazana bilərik. Bundan sonra daha bir neçə oyunçu ala bilərik. Hələ ki əlimizdə olanlarla çıxış edəcəyik.

– Komanda istədiyiniz oyun modelini formalaşdıra bilib?
– Yox. Görmək istədiyim rəsm bu deyil. Dediyim kimi, vaxt az idi. Əslində hücum futbolu oynatmaq istərdim. Yenə də bütün hücum cəhdlərindən maksimum yararlanmağa çalışacağıq. Futbolçular bunu başa düşsə, yaxşı olar.

– Sələflərinizdən biri deyir ki, “Şerif” qol buraxmasa, uduzmayacaq.
– Elə rəqiblər var ki, onların qol vurmasına imkan verməməlisən. Biz azarkeşlər üçün əsl tamaşa nümayiş etdirmək istəyirik. Məncə, onlar hücum futbolunu sevir. Bunu bacarsaq, həmişə stadiona gələcəklər.

– “Zirə”yə 1:0, yoxsa 5:3 hesabıyla qalib gəlməyə üstünlük verərdiz?
– 1:0 (gülür).

KƏNAN BAHADIR