Türkiyə futbolundan yenə qeyri-adi xəbərlər gəlir.

Mövsüm hələ başlamasa da, Türkiyədən artıq istefa xəbəri var! Ötən mövsüm superliqada yerini qoruya bilməyən və aşağı liqaya yuvarlanan “Ankaragücü” bu uğursuzluğun baş memarı Əmrə Belözoğlu ilə yollarını ayırmışdı. İyunun 11-də paytaxt təmsilçisi baş məşqçi vəzifəsinə Kamal Özdəşin gətirildiyini açıqlamışdı. Amma srağagün gözlənilməz olay yaşandı. Ankara klubu təcrübəli mütəxəssislə də vidalaşdığını açıqladı! Rəsmi açıqlamada ayrılığa səbəb kimi məşqçi ilə rəhbərliyin yeni mövsümlə bağlı planlarının üst-üstə düşməməsi göstərildi. Beləliklə, “Ankaragücü”də Kamal Özdəş dönəmi cəmi 26 gün davam etdi. Yeni məşqçinin adı artıq bəllidi. Rəhbərlik çox düşünmədən klubun başına Cihat Arslanı gətirdi. Ən son ötən mövsüm “Şanlıurfaspor”u çalışdıran 54 yaşlı Arslan ilə “1+1” illik müqavilə imzalanıb.

Məşqçi mövzusundan söhbət düşmüşkən, bir xəbəri də diqqətinizə çatdıraq. Hikmət Karamanla yola davam etməyən “Adana Dəmirspor” yeni məşqçi ilə anlaşıb. Yağız Sabuncuoglunun paylaşdığı məlumata görə, Şahruddin Məhəmmədəliyevin sabiq klubu Mixael Valkanislə anlaşıb. 49 yaşlı yunanəsilli avstraliyalı mütəxəssis müqavilənin detallarını razılaşdırmaq və klubun şəraiti ilə tanış olmaq üçün Adanaya gəlib. Dünən onunla başqan Murat Sancak arasında görüş keçirilib. Rəsmi açıqlamanın ən qısa müddətdə veriləcəyi gözlənilir.

Valkanis məşqçi karyerasının böyük hissəsini köməkçi qismində keçirib. Bu vəzifədə o, “Adelaida Yunayted”, “Melburn Siti”, “Zvolle”, Yunanıstan yığması və son olaraq “Ayaks”da çalışıb. Müstəqil məşqçi kimi isə 2022-də “Eupen”i, ötən il Təl-Əviv “Hapoel”ini çalışdırıb.