Qriqorçuk tədbirə gəlibmiş, tora düşüb?
Roman Qriqorçukun iyunun 26-da "Neftçi"nin baş məşqçisi vəzifəsinə təyin olunması təəccüblə qarşılandı.
Çünki illər öncə "Qəbələ"dən ayrılan mütəxəssisin yenidən Azərbaycanda qayıtması sıradan hadisə deyildi. Təəccüb doğuran yeganə məqam bu deyildi. “Neftçi”nin ukraynalı məşqçiyə "xoş gəldin" paylaşımında bir cümlə gözdən qaçmadı:
“Təcrübə mübadiləsi məqsədilə beynəlxalq tədbirdə iştirak etmək üçün Bakıda səfərdə olan Qriqorçukla anlaşma əldə olunub”.
Maraqlısı odu ki, Qriqorçuk 2018-də “Qəbələ”dən ayrılandan sonra onu Azərbaycanda görən olmayıb. Görəsən, hansısa təcrübə proqramında, hansı beynəlxalq tədbirdə iştirak edirmiş? Bu sualı “Neftçi”nin mətbuat xidmətindən Xəyalə Şahlarlıya ünvanladıq. Onun “Football-plus.az”a cavabı:
“Bu məsələnin bizim kluba heç bir aidiyyatı yoxdu. Yəni bizlə bağlı deyil. Ona görə də hansı təcrübə proqramı olduğuna dair məlumat verə bilmərik”.
Ukraynalı mütəxəssisin özündən cavab almaq istəsəyimiz də alınmadı. Çox güman ki, “Neftçi” Qriqorçukla xeyli əvvəldən danışıq aparıb. “Təcrübə mübadiləsi məqsədilə beynəlxalq tədbirdə iştirak” versiyası isə yumşaq desək, gözə gül üfürməkdi! Yox bir, Roman İosifoviç başqa tədbir üçün gəlibmiş, “Neftçi” də tez-bazar onunla müqavilə bağlayıb... Buna kim inanar?
RÖYANƏ OĞUZ
Digər xəbərlər
