“Potensialı, strategiyası və növbəti mövsüm üçün hədəfləri məni cəlb etdi”
Futzal millimizin qapıçısı Rövşən Hüseynlinin Qazaxıstan “Atırau”sundan ayrılandan sonra klubsuz qaldığını yazmışdıq. O, qəzetimizə açıqlamasında sabiq komandasının daha birillik müqavilə təklif etməsinə baxmayaraq, dincəlmək istədiyini, daha sonra gələn dəvətləri dəyərləndirərək ən doğru seçimi edəcəyini bildirmişdi. Artıq məsələyə yekun vurulub. Belə ki, futzalçı sosial şəbəkə hesabında məlumat yayaraq Qazaxıstanın bir başqa klubu – “Astana” ilə anlaşdığını yazıb.
33 yaşlı qolkiperlə əlaqə saxlayıb, seçimi, yeni klubunun və özünün hədəfləri ilə bağlı ətraflı məlumat aldıq. Rövşən bəy qəzetimizə açıqlamasında yenidən Qazaxıstan klubuyla anlaşmasının səbəbini belə izah etdi:
“Bəli, həm Azərbaycandan, həm də başqa ölkələrdən təkliflər var idi. Lakin “Astana”nın potensialı, strategiyası və növbəti mövsüm üçün hədəfləri məni cəlb etdi. Komanda həmişə yüksək pillələr uğrunda mübarizə apararkən çətinliklə üzləşib. Amma indiki kollektivin heyəti, yeni bvraziliyalı baş məşqçinin təyinatı böyük hədəflər üçün ümid verir. Artıq ciddi uğurlar uğrunda mübarizə aparmaq mümkündü. Bu yöndə işlərə start verilib. İndi heyət formalaşdırılır”.
Bilindiyi kimi, futzal çempionatının aparıcı klubu və son çempionu “Araz-Naxçıvan” Rövşənin xidmətində maraqlı idi. Hətta Muxtar Respublika təmsilçisinin vitse-prezidenti Mahmud Sadıqov “Futbol+”lə söhbətdə futzalçıyla görüşüb sabiq komandasına qayıtması istiqamətində müzakirələr aparacağını demişdi. Görünür, 2022/23 mövsümünün sonunda olduğu kimi, bu dəfə də sövdələşmə alınmayıb. Rövşəndən bunun da səbəbini soruşduq:
“Araz-Naxçıvan” mənim üçün doğma klubdu. Təbii ki, bu yerlərə gəlməyimdə böyük pay sahibidilər. Bu gün də rəhbərliklə səmimi münasibətimiz və müntəzəm əlaqələrimiz var. Seçim edərkən onlarla da danışdıq və qarşılıqlı razılıq əsasında daha bir il legioner həyatı yaşamağımın faydalı olduğuna qərar verdik”.
Futzalçının şəxsi hədəfləri isə belədi:
“Karyeramın gələcəyi haqda dəqiq nəsə deyə bilmərəm. Bir ildən sonra “Astana”da qalıb-qalmayacağım bəlli deyil. Əslində bunun elə də fərqi yoxdu. İlk növbədə özümlə bağlı qərarlar verəcəm. Artıq 15 ildi futzalçı kimi çıxış edirəm. Həmişə əlimdən gələnin ən yaxşısını etməyə çalışmışam. Təbii ki, bundan sonra da belə olacaq. Əsas məqsədim Azərbaycanı istər idman, istərsə də xarakter cəhətdən layiqincə təmsil etməkdi. Digər tərəfdən, hər sahədə maksimum şəkildə nəticə göstərmək niyyətindəyəm”.
Yeri gəlmişkən, Rövşənlə “Araz-Naxçıvan”ın danışıqlarının alınmamasının səbəbləri haqda klubun mövqeyini də öyrənməyə ehtiyac duyduq. Bu məqsədlə əlaqə saxladığımız vitse-prezident Mahmud Sadıqov bunları dedi:
“Futzalçımıza uğurlar arzulayırıq. Onu deyim ki, biz ona, ümumiyyətlə, təklif göndərməmişdik. Çünki hələ komandanın formalaşdırılması istiqamətində işlərə başlamamışıq. Prosesə iyulun 10-da start veriləcək. Bu üzdən anlaşdığımız legionerlərə də yalnız 10-dan sonra müqavilə imzalana biləcəyini demişik”.
KƏNAN BAHADIR
Digər xəbərlər
