2022/23 “futbol ili” bitəndən sonra “Sabah”da xaotik durum yaranmışdı.

Bu il olduğu kimi, onda da Konfrans Liqasına vəsiqə qazanan “bayquşlar” heyətlə bağlı dəyişikliklər mövzusunda “sirli qutu” təsiri bağışlayırdı. Sonradan bəlli oldu ki, sən demə, ümumi mənzərə “fırtınaöncəsi sakitlik” imiş. Yox, yay “transfer pəncərəsi”ndə komandada xeyli ayrılıq olmadı. Sadəcə, Aleksey Kaşukla Coy-Lens Mikelsin gözlənilməz ayrılığı kollektivi xeyli zəiflətdi. “Qol silahları”nı itirən “tələbələr” dərhal xeyli oyunçu tranfser etdi ki, onların bir-birinə uyğunlaşması, özlərini yaxşı tərəfdən göstərməsi uzun zaman aldı. Masazır təmsilçisi bu mənada qış “transfer pəncərəsi”ndə də sürprizlə qarşılaşdı. Daha bir aparıcı oyunçunun ayrılması, daha dəqiq desək, Aleksey İsayevin “Qarabağ”a keçidi komandanın onurğa sütununu da parçaladı. Hadisələrin ötən mövsümdəki axarı “bayquşlar”ın avrokuboklardan kənarda qalmaq təhlükəsiylə üzləşməsinə qədər uzandı. Hələ Murad Musayevin dövründə yaşananları demirəm. Hər halda, bu barədə dəfələrlə danışdığımız üçün ehtiyac yoxdu. Qısası, “Sabah”ın problemləri mütəmadi xarakter daşıyır.
Bu günə qayıtsaq, eyni mənzərənin şahidi olacağımıza şübhə yoxdu. Yeni bəzi məsələlər var ki, kollektivlə bağlı idarəçilikdə ciddi səhvlərin olduğuna işarədi. Birincisi Jarl Marqarita ilə bağlıdı. “Tələbələr”in ötən mövsümün əvvəlində transfer etdiyi 24 yaşlı sağ cinah müdafiəçisiylə bağlı bilgilər xoşagələn deyil. Biz hansısa iddiadan və ya etibarlı mənbədən əldə etdiyimiz məlumatdan danışmırıq. Söhbət “Sabah”ın məşqçisi Saşa Sablyakın Xorvatiyanın məşhur “cityportal.hr” nəşrinə dediklərindən gedir. Qəzetimizin ötən sayında yazdığımız kimi, Marqarita məşqlərdə qeyri-etik davranışlara yol verdiyindən komandadan uzaqlaşdırılıb! Məsələni dəqiqləşdirmək məqsədilə klubun mətbuat xidmətinin rəhbəri Elnur Həmidovla əlaqə saxladıqda məlum oldu ki, legioner hələ də komandanın üzvüdü. Görünür, klub müqavilə müddəti 2027-ci ilin yayında bitəcək futbolçunun əvəzedicilər liqasında “dərsini alacağını” düşünür. Düzdü, ümumi təcrübəyə əsasən, belə cəzaların müəyyən faydası müşahidə olunur. Lakin “Sabah”ın bunu nə dərəcədə bacaracağı sual altındadı.

İkinci məqam Davit Volkovla bağlıdı. 29 yaşlı mərkəz hücumçusu karyerasına sabiq komandası “Zirə”də davam edəcək. Ona həm uğurlar arzulamağa, həm də məqsədinə çatdığına görə təşəkkür etməyə dəyər. Çünki gürcüstanlı yanvardan bəri “qartallar”ın formasını geymək eşqi ilə alışıb-yanırdı. Buna imkan verməyən “Sabah”ı “küncə sıxıb” arzusuna çatdı. Volkovun “Qəbələ”ylə matçda aldığı qırmızı vərəqə bir çox suala aydınlıq gətirdi. Ümumiyyətlə, onun davranışlarının “buraxın, gedim!” sözündən başqa tərcüməsi ağla gəlmir. Beləcə Coy-Lens Mikelsin etdiyini başqa dildə təkrarlayan hücumçu “bayquşlar”ın komandayla bağlı “yumşaqlığını bir daha gün üzünə çıxardı. Görəsən, növbəti üsyankar kim olacaq?

Bilindiyi kimi, “Sabah” Konfrans Liqasının 2-ci təsnifat mərhələsində Hayfa “Makkabi”siylə qarşılaşacaq. Rəqibin gücü və səviyyəsi bəllidi, şübhəsiz, “bayquşlar”dan üstündülər. Krunoslav Renduliçin məsələylə bağlı açıqlamasından da bilinir ki, püşk xəyal qırıqlığıyla nəticələnib. Bu öz yerində. İş orasındadı ki, problem bununla bitmir. Kollektiv güclənmək niyyətində deyil. Saşa Sablyakın dediyinə görə, “tələbələr” ötən mövsümdə transferlərlə bağlı xeyli xərcə düşdüyündən bu dəfə “transfer pəncərəsi”ndən istənilən kimi yararlanmaq mümkün olmayacaq. Kollektivin komplektləşdirilməsiylə bağlı sükutun əsas səbəbi də məzh budu. Bəs necə olacaq? Allah uzaq etsin. Komanda elə ilk mərhələdə mübarizəni dayandırsa, sadəcə, Renduliçi top-tüfəşglə qarşılayacağıq? Mən belə etməyəcəm. Ona görə ki, “Sabah”ın əsas sindromu göz önündədi. Rəhbərlik futbolçularla bağlanılan müqavilələrin müddətində tələskənliyə, şərtlərlə bağlı diqqətsizliyə yol verirsə, məsuliyyətin bölünməsi labüddü. Digər tərəfdən, futbolçuların nazıyla oynamaq fayda verməyəcək. “Gedəni saxlamaq olmaz” deyiblərsə, ənənəvi məsələ boyun əymək lazımdı. Məhz bu mövzuyla vaxtında addım atılmadıqca, müqavilə şərtləri tənzimlənmədikcə Mikels, Volkov, Marqarita nümunələri artacaq. Üsyankarlar haqsızdısa, cəzalar yumşaq olmamalıdı...

KƏNAN BAHADIR