''Trabzonspor'' fanatları 38 illik fasilədən sonra gələn çempionluğu qeyd etməkdə davam edirlər.

Bunun sayəsində komanda tək meydanda yox, həm də maddi məsələlərdə xeyli irəli düşüb. Belə ki, mayın sonuna olan göstəricilərə əsasən ''Trabzonspor'' klub atributlarının satışından 200 milyon lirə (təxminən 20 milyon manat) gəlir əldə edib! Buna qədər klubun bir mövsümdə forma və başqa atributlardan ən yaxşı halda 85 milyon lirə qazandığını nəzərə alsaq, çempionluqdan sonra satışın təxminən 2,5 dəfə çoxaldığını görürük. Konkret forma satışında da yeni rekord müəyyənləşib. Belə ki, geridə qoyduğumuz mövsüm 250 min forma satılıb! Üstəlik bu məbləğə çempionluğun rəsmiləşməsindən sonra satışa buraxılan xüsusi formalar daxil deyil. Belə ki 749 lirəyə (75 manata) satılan həmin xüsusi formalar satışa buraxılandan sonra artıq 20 mindən çox satılıb! Bu forma üçün sifarişlər hələ də davam edir. Bu mövsümə qədər forma satışında rekord 192 minə bərabər idi. Onu da bildirək ki, yeni mövsümün formaları gələn aydan etibarən satışa çıxarılacaq. İyulun əvvəllərində iki fərqli forma klubun rəsmi dükanlarında olacaq. Ayın sonunda isə 3-cü forma da hazır olacaq.

Yeri gəlmişkən, Türkiyə mətbuatının yazdığına inansaq, baş məşqçi Abdulla Avcı köməkçiləri arasına yeni bir isim qatacaq. Həmin məşqçi yalnız standart zərbələr üzərində çalışacaq. ''Trabzonspor'' geridə qoyduğumuz mövsüm çempion olsa da, qollarının yalnız 13 faizini (69 qoldan 9-nu) standart zərbələrdən vurmağı bacardı. Komandanın bu performansı 58 yaşlı mütəxəssisi qane etməyib. Ona görə də Avcı son dönəmlər Avropada geniş istifadə olunan praktikadan yararlanaraq komandaya standart zərbələr üzrə məşqçi gətirmək istəyir. Həmin məşqçi künc zərbələri, cərimə zərbələri və autlar zamanı komandanın daha çox təhlükəli vəziyyət yaratmasına yardım edəcək. Hələ ki bu məşqçinin kim olacağı bəlli deyil. Ötən mövsüm bu baxımdan ''Liverpul'' diqqəti çəkməyi bacarmışdı. Belə ki, Yürgen Klopp komandaya konkret aut atışları üzrə mütəxəssis sayılan Tomas Qrönnemarkı gətirmişdi. AÇ-2020-də İtaliya və Danimarka yığmalarının məşqçilər korpusunda da ayrıca standart zərbələrə cavabdehlik daşıyan mütəxəssis var idi.