“Futbolsuz qalmayacam” - Bəhlul Mustafazadənin ilk məşqçisi
“Qarabağ”ın müdafiəçisi Bəhlulun atası Ələmdar Mustafayevin “Kür-Araz”ın baş məşqçi postundan istefa verdiyini bir müddət öncə xəbər vermişdik.
Təcrübəli çalışdırıcı 2-ci liqa təmsilçisindən ayrılmasının səbəbi kimi rəhbərliyin qeyri-peşəkar davranışını əsas gətirmişdi. Bəs onun karyerasıyla bağlı hansısa planıı var? Yoxsa təcrübəli futbol adamı, ümumiyyətlə, futbolla vidalaşdı? “Football-plus.az” olaraq, maraq doğuran suallara cavab tapmaq üçün Ələmdar Mustafayevlə əlaqə saxladıq:
“Planımda bir komanda var. Sadəcə, dəqiqləşmədiyi üçün indi demək istəmirəm. Yaxın zamanlarda bəlli olacaq. Amma yüz faiz əminliklə deyə bilərəm ki, futbolsuz qalmayacam”.
O, bundan sonra çalışacağı klubun hansı liqada çıxış etməsi barədə də məlumat verdi:
“Təklif 1-ci liqadandı. İnşallah, razılaşsaq, orda köməkçi məşqçi kimi fəaliyyət göstərəcəm. Doğrusu, Bakıya gəlmək fürsətim də var idi, ailəm də orda yaşayır. Sadəcə, buranı tərk etmək istəmirəm”.
Xatırladaq ki, İmişli şəhərinin 2-ci liqada mübarizə aparan “Kür-Araz”la yanaşı, 1-ci liqda çıxış edən “İmişli” klubu da var.
KAMAL SƏFƏR
