Yeni yaradılan 2-ci liqada vaxtilə premyer-liqada çıxış etmiş futbolçulara da rast gəlirik. Bunlardan biri də Cavid İmamverdiyevdi. 33 yaşlı oyunçu hazırda çıxış etdiyi “Kür-Araz”ın əsas simalarındandı. Daha əvvəl meydana çıxdığı oyunlarda 1 qolla yadda qalan İmamverdiyev dünən “Kürmük Qax”la oyunda het-trikə imza atdı. Millinin sabiq üzvü “Football-plus.az”a bunları dedi: “Bu liqa düşündüyümdən də maraqlı keçir. Azarkeşlərin də bu çempionata marağı böyükdü. Komandamız da pis deyil. Sadəcə, bir-iki mövqeyə futbolçu lazımdı. Öz çıxışıma gəlincə, karyeramı bitirəndən sonra gəlib 2-ci liqada belə oynamaq və het-trik etmək əladı. İnşallah, gələn görüşlərdə də bunun davamını gətirərəm”.
İmamverdiyev bundan sonra diqqətini məşqçiliyə yönəldəcək: “Artıq peşəkar futbolu iki-üç il əvvəl silmişəm. Hazırda bütün diqqətimi məşqçi kareyrama yönəltmişəm. Məqsədim balaca balalarımıza vaxt ayırıb gələcək üçün yetişdirməkdi”.
Cavid dünənki oyunu stadiondan izləyən “Qarabağ”ın müdafiəçisi Bəhlul Mustafzadə haqda da danışdı: “Bildiyiniz kimi, Bəhlul İmişlidəndi. Həm də onun atası Ələmdar müəllim bizim baş məşqçimizdi. Çox sağ olsun ki, gəlib oyunumza baxdı. Lakin hansı səbəbdən gəldiyini bilmirəm. Bəhlul perspektivli və xətrini istədiyim oyunçudu. Ona da karyerasında uğurlar arzulayıram”.
CAVİD ƏLİYEV