Dortmundda iki ayrılıq - Terziçlə Hummels “Borussiya”nı tərk etdi
“Borussiya”nın azarkeşləri Çempionlar Liqasının finalında “Real”a məğlubiyyətin (0:2) məyusluğundan tam qurtulmamış ikiqat itkinin şokunu yaşayıb: baş məşqçi Edin Terziçlə aparıcı oyunçulardan Mats Hummels komandanı tərk edib.
“Football-plus.az” xəbər verir ki, Terziç klubdan öz istəyi ilə ayrılıb. 41 yaşlı mütəxəssis müqaviləsinin pozulmasını istəyib, rəhbərlik isə onun xahişini yerə salmayıb. Terziç “Borussiya”ya 2022-ci ildə təyinat almışdı. 2020/21 mövsümündə baş məşqçinin səlahiyyətlərini yerinə yetirən almaniyalı çalışdırıcı komandadan ayrılmasını belə izah edib:
“Klubda yeni eranın başlaması üçün məşqçilər korpusunun yenilənməsinin zəruriliyini anladım. Yaxınlarım bu qərarı verməyin mənim üçün nə qədər çətin olduğunu yaxşı bilirlər. Amma uzun götür-qoydan sonra gəldiyim ilkin qənaəti dəyişmədim. “Borussiya”ya bundan sonrakı fəaliyyətində uğurlar diləyirəm. Yenidən görüşəcəyimizə ümid edirəm”.
Artıq Terziçin xələfi məlumdu. Onun yerinə Nuri Şahin təyinat alıb. 35 yaşlı mütəxəssis futbolçu karyerasının 2005-11 və 2013-18-ci illərini “Borussiya”da keçirib. 2021-23-cü illərdə “Antalyaspor”u çalışdıran gənc mütəxəssisin Dortmund klubu ilə imzaladığı müqavilənin müddəti 2027-ci ilin yayına qədər nəzərdə tutulub.
“Borussiya”nın formasını 13 il geyən Hummels də getməyi lazım bilib. 35 yaşlı müdafiəçi qərarını belə şərh edib:
“Əziz azarkeşlər! Bu komandadakı vaxtım sona çatır. “Borussiya”da müəyyən fasilələrlə 13 il çıxış etdim. Bu kluba uzun müddət xidmət etməyi özüm üçün böyük şərəf hesab edirəm. Mən 2008-ci ilin yanvarında bundesliqada 13-cü yerdə olan komandadan indiyədək böyük yol qət edən klubun üzvü sayılmışam. Bu klub və yerli azarkeşlər qeyri-adidi”.
Digər xəbərlər
