“Antalyaspor”dan sürpriz xəbər gəldi.

“Football-plus.az” xəbər verir ki, belə ki, bu klubda Nuri Şahin dönəmi başa çatdı! Gənc mütəxəssis doğma klubuna, yəni Dortmund “Borussiya”sına yollanır. Yeni ildən etibarən Şahin bu klubda məşqçilər korpusuna daxil olacaq və ikinci dövrədə Edin Terziçin köməkçisi vəzifəsini icra edəcək. Tərəflər arasında əldə olunan anlaşmaya görə mövsümün sonunda Terziç idman direktoru vəzifəsinə keçəcək və Şahin “arılar”ın yeni baş məşqçisi olacaq! 35 yaşlı gənc türkiyəli mütəxəssis o vaxtda qədər həm də kursları bitirərək Pro lisenziyasını almış olacaq. Hazırda Şahinin Pro lisenziyası yoxdu. Türkiyə mətbuatının yazdığına inansaq, yayda “Borussiya” ilə Şahin arasında dördillik müqavilə imzalanacaq. Nuri Şahinin “Antalyaspor”la müqaviləsinin müddəti 2026-ya qədər nəzərdə tutulmuşdu. O, Dortmunda yollanmaq üçün “Antalyaspor”un ona olan bütün borclarından imtina edib, üstəlik öz cibindən kluba kiçik bir təzminat ödəyib. “Ağ-qırmızılar”ın başqan vəkili Alkan Evren məsələ ilə bağlı bunları deyib: “Təbii ki, Nuri Şahin kimi dəyərli futbol adamı ilə yollarımızı ayırmalı olduğumuz üçün üzgünük. Amma digər tərəfən “Borussiya” kimi klubdan təklif aldığımız üçün qürurluyuq. Nuri Şahinə yeni işində uğurlar arzulayırıq”.

Xatırladaq ki, 1988-ci ildə Almaniyada doğulan Şahin məhz “arılar”ın yetirməsidi. O, peşəkar karyerasına 2005-ci ildə bu klubda başlayıb və Dortmundda populyarlıq qazanıb. Uğursuz “Real” və “Liverpul” macəralarının ardından 2013-də yenidən “Borussiya”ya qayıdaraq daha 5 il burda top qovub. “Borussiya”da ümumilikdə 274 oyunda 26 qol, 49 məhsuldar ötürmə ilə fərqlənib və 1 ölkə çempionluğu olmaqla 3 titul qazanıb. 2 mövsüm “Verder”də oynadıqdan sonra 2020-də Türkiyəyə gələn Şahin əvvəlcə 1 il “Antalyaspor”da futbolçu kimi çıxış etdi. Amma 2021-ci ilin oktyabrın 5-də futbolçu karyerasını başa vurduğunu açıqlayaraq gözlənilmədən bu klubun başına keçdi. O vaxtdan bəri “Antalyaspor” bu məşqçinin başçılığı altında 92 rəsmi oyundan 38 qələbə, 23 heç-heçə, 31 məğlubiyyətlə ayrılmışdı. İlk cəhddən Şahin antalyalılarla həm kubokun finalında, həm də superkubokda oynasa da, hər iki matçda “Beşiktaş”a məğlub olmuşdu. Elə həmin mövsüm “Antalyaspor” superliqada 14 oyunluq məğlubiyyətsiz seriya yaxalamış və şəxsi rekordunu yeniləmişdi. Bu mövsüm isə komanda 17 oyuna topladığı 24 xalla 8-ci pillədə qərarlaşıb. Şahin hazırda superliqada işləyənlər arasında 2 il 2 ay 23 gün ilə ardıcıl olaraq ən uzun müddət çalışan mütəxəssis statusunda idi. Onun ayrılmasından sonra bu status Okan Buruka keçdi. Buruk hazırda 1 il 6 ay 6 gündü “Qalatasaray”ın başındadı.

Onu da bildirək ki, Nuri Şahinin ayrılması ilə birlikdə bu mövsüm superliqada məşqçisi ilə ən azı bir dəfə vidalaşan klubların sayı 15-ə yüksəldi. Yəni 20 klubdan yalnız 5-i – “Qalatasaray”, “Fənərbaxça”, “Sivasspor”, “Hatayspor” və “Çaykur Rizəspor” mövsümə başladıqları məşqçi ilə yolda davam edirlər.