“İlk növbədə onu qeyd edim ki, Berdıyevin “Turan Tovuz”a gəlişini müsbət qiymətləndirirəm. Təcrübəli çalışdırıcıdı, bir sıra aparıcı klublara rəhbərlik edib və çoxlu uğura imza atıb. “Turan Tovuz”da nə dərəcədə uğurlu olacağına gəlincə, hesab edirəm ki, rəhbərliklə danışılıb, şərtlər və hədəflər bəllidi. Yəqin ki, qarşısına qoyulan hədəflərin öhdəsindən gələ biləcəyini düşündüyü üçün belə addım atıb. Bir müddət öncə Ehtiram Quliyevlə həmsöhbət oldum. Onunla danışanda belə başa düşdüm ki, klub rəhbərliyinin növbəti mövsüm üçün hədəfi avrokuboklara vəsiqə qazanmaqdı. Bu üzdən də o posta ən uyğun namizəd kimi Berdıyev göstərilib. Yaşlı olmasına gəlincə, əlbəttə, 71 yaş çoxdu. Ancaq bunun indiki dönəmdə o qədər də əhəmiyyət daşımadığını düşünürəm. Çünki elə adam var ki, 90 yaşındadı, lakin kifayət qədər gümrahdı. Fəqət eləsi də var ki, artıq 50-60 yaşda taqətdən düşür, heç bir işlə məşğul olmağı bacarmır. Özümün də 70 yaşım tamam olacaq. Kənardan baxanlar bəlkə də elə bilir ki, Vidadi müəllim daha qocalıb, əlindən heç nə gəlmir. Ancaq düşünürəm ki, indi də verilən hər bir tapşırığın öhdəsindən layiqincə gələ bilərəm. Hazırda dünyanın bir sıra aparıcı ölkələrinin prezidentləri yaşlıdı və bu da öz növbəsində heç bir problem yaratmır. Əslinə qalsa, insanın yaşı nə qədər çox olarsa, müdrikliyi də bir o qədər artır”.
Maraq doğuran suallardan biri də acgözlükdü. Yəni bir çalışdırıcı bu vaxta qədər maksimum uğurları əldə edibsə, onu bundan sonra daha iddialı olmağa nə sövq edəcək? Berdıyevin 15-20 il əvvəlki həvəsi indi də ola bilərmi? Sabiq prezidentin cavabı belə oldu: “Gənc yaşlarda olsaydım, bəlkə mən də sizin kimi düşünərdim. Bayaq da qeyd etdiyim kimi, 70 yaşım tamam olacaq. Lakin bir şeyi anlayıram ki, insanın həvəsi heç vaxt ölmür. Həvəs, istək, rəqabət insanın xarakterindən asılı olan şeylərdi. İşinə maraq göstərən hər kəs sonda nəticəsini görür”.

“Düşünürəm ki, elə Kurban Berdıyev ən yaxşı seçimdi. Ancaq Kurban müəllimdən qabaq fikrimdə başqa çalışdırıcılar da var idi. Məsələn, çalışdığım məşqçilərdən Naci Şensoyu nümunə çəkərdim. Fəqət Berdıyevin də geri qalacağını düşünmürəm”.