“Turan Tovuz” premyer-liqaya yüksəldiyi gündən klubun yaradıcısı və ilk prezidenti Vidadi Əhmədov daim “boz qurdlar”ın yanında olub.

Vidadi bəy imkan daxilində Tovuz təmsilçisinə maddi planda kömək etməyi də özünə borc bilib. Ancaq bu günlərdə “Footbal-plus.az” saytına daxil olan məlumata görə, Vidadi bəy “boz qurdlar”dan inciyib. Daha əvvəlki kimi klubun işləri ilə maraqlanmır, düşərgəyə baş çəkmir. Kluba yaxın mənbədən əldə etdiyimiz məlumata inansaq, Oqtay Abdullayevin “Turan Tovuz”un prezidenti təyin olunmasından sonra Əhmədov klubun Müşahidə Şurasının sədri olacağını düşünürmüş. Lakin onun bu istəyi gerçəkləşməyib. Vidadi bəy şurada sadəcə, müşahidəçi kimi təmsil olunub. Bu isə klubun yaradıcısı və ilk prezidentinin ürəyincə olmayıb.

Xatırladaq ki, hazırda qərblilərin Müşahidə Şurasının sədri Rəşid Məhərrəmovdu. Vaxtilə klubun vitse-prezident olmuş Yaşar Sultanov, Vidadi Əhmədov, Milli Məclisin deputatı Arzu Nağıyev, “Turan”un formasını geyinmiş veteran futbolçu Alı İbrahimov və rayonun Gənclər və İdman İdarəsinin rəisi Sahib Ələsgərov isə şuranın üzvləridi.

RƏŞAD