“Başverənlər çempion komandanın adına ləkədi” - “Şamaxı”nın maliyyə sıxıntısı aranı qatdı
Premyer-liqaya yüksələn “Şamaxı”da komandayla bağlı islahatların aparıldığından xəbərdarıq.
Elita təmsilçisi heyətdəki xeyli futbolçuyla yollarını ayrımaqla yanaşı, məşqçilər korpusuyla da vidalaşıb. Daha dəqiqi, Ramiz Məmmədov əvvəlki vəzifəsinə - klubun idarə heyətinin sədr müavini postuna dönüb. Digər mütəxəssislərin, yəni Məqsəd Yaqubəliyev, Elnar Kərimov və Mehman Baxışovun isə “qələmi qırılıb”.
Bu hadisələr fonunda bir neçə gün əvvəl klubun maliyyə çatışmazlığı yaşadığı üzə çıxdı. Sən demə, məşqçilər və futbolçular son iki ayın maaşını ala bilməyib. Hətta bir neçə oyunçunun komandadan ayrılmasının səbəbi məhz maddi vədlərin yerinə yetirilməməsidi. İddialarla bağlı əvvəl klubun rəsmi mövqeyini öyrənməyi lazım bildik. Bu məqsədlə “Şamaxı”nın baş meneceri Kamran İsmayılovla əlaqə saxladıq ki, o, məsələni belə izah etdi:
“İddiaların yarısı gerçək, yarısı uydurmadı. Bəli, futbolçular aprel də daxil olmaqla maaş ala bilməyib. Lakin ayrılıqların yaşanmasının səbəbi bu deyil. Xidmətində maraqlı olduğumuz oyunçularla razılığa gəlmişik. Qalanlarına isə gələcək karyeralarında uğurlar arzulayıb yola salmışıq. Bildirmək istəyirəm ki, “Şamaxı” indiyə qədər heç kimə bir qəpik belə borclu qalmayıb. Ən qısa zamanda hər kəsin maaşı ödəniləcək”.
Beləliklə, klubun maliyyə sıxıntısı yaşadığı rəsmən təsdiqləndi. Belədə ağla bir qədər əvvəl yola salınan məşqçilərin durumu gəlir. Görünür, onlara da pul ödənilmədən “yaxşı yol” deyilib. Məsələni dəqiqləşdirmək və ümumi ab-havayla bağlı ətraflı bilgi almaq məqsədilə yuxarıda adını çəkdiyimiz mütəxəssislərlə əlaqə saxlasaq da, yalnız “Şamaxı”ının qapıçılar üzrə sabiq məşqçisi Elnar Kərimov dəstəyi götürdü. O, qəzetimizə açıqlamasında məlumatı təsdiqlədi:
“Düzü, o qədər hadisə baş verib ki, deməklə bitən deyil. Bilirəm ki, komanda premyer-liqaya yüksələndən dərhal sonra yola salınmağımız ictimaiyyət tərəfindən birmənalı qarşılanmayıb. Bu, mənim üçün də belədi. Bilindiyi kimi, dekabrda Ramiz müəllimin (Məmmədov – red.) dəvətini qəbul edib “Şamaxı”ya yollandım. Düşündüm ki, B kateqoriyalı məşqçi olduğum üçün peşəkar klubda çalışa bilərəm. Mən komandaya gələnə qədər xeyli qol buraxılmışdı. İşə başladıqdan sonra müəyyən mənada dəyişikliklər etməyi bacardım. Şükür Allah, əziyyətimiz yerdə qalmadı. Kollektiv çempion kimi premyer-liqaya vəsiqə qazandı. Bundan sonra hər şey dəyişdi. Rəhbərlik elitaya yüksələcəyimiz təqdirdə işimə davam edəcəyimi bildirmişdi. Lakin sonradan sözlərindən döndülər. Səbəb nə idi? Özümü tərifləmək istəmirəm. Onu deyə bilərəm ki, vəzifəmin öhdəsindən layiqincə gəldim. Hətta etdiklərim rəhbərlik tərəfindən müzakirə olundu. Görüş zamanı işimdən razı qaldıqlarını bildirdilər. Fəaliyyətimə görə təşəkkür edərək premyer-liqaya çıxdıqdan sonra da bir yerdə işləyəcəyimizi dedilər. Təbii ki, hər şeyi təkcə mən etməmişəm. Burda qapıçıların da böyük rolu oldu. Bunu dana bilmərəm. Onlar çıxışlarıyla sübut etdilər ki, 1-ci liqanın ən yaxşı qolkiperləridi. Mən hətta akademiyanın məşqçilərinə də məşq keçirdim. Sonda belə qərar verildiyinə görə çox təəccübləndim. Maaşa gəlincə, bəli mənim əməkhaqqım da ödənilməyib. Nə maaş verilib, nə də mükafat. Məncə, proses bu həddə gəlməməliydi. Hazırda başverənlər çempion komandanın adına ləkədi. “Şamaxı”yla bağlı xoşagəlməz halları mətbuatdan oxuyanda üzvü olmuş biri kimi çox kədərləndim. Lakin bunu məndən əvvəl rəhbərlik düşünməli, ən azı ayrılan futbolçu və məşqçilər ilə halallaşmalıydılar. Maaş və mükafatlar heç olmasa, vida günü verilsəydi, heç kim incik qalmazdı, hər kəsin könlü alınardı. Niyə belə edirlər? Mənə də maraqlıdı. Nəinki “Şamaxı”, bütün klublarımız belə əmələ yol verməkdən çəkinməlidi. İndi belə hadisələrin yaşanması göstərir ki, Azərbaycan futbolu çox bərbad səviyyədədi”.
Elnar bəy komandayla yolların ayrılması prosesini belə izah etdi:
“Rəhbərlik mənə zəng edib yeni baş məşqçinin gələcəyini və öz köməkçiləriylə işləmək istədiyini dedi. Bunu pis qarşılamadım. Sadəcə, daha əvvəl verilən sözləri xatırladaraq bildirdim ki, həm maaşımın, həm də mükafatımın verilməsi daha yaxşı olar. Çünki ailəmdə böyük maddi sıxıntılar var. Maaşla dolanırıq. Başqa yerdən gəlirim yoxdu. Boş yerə vəd verdilər ki, tezliklə hər şey yoluna düşəcək. Lakin hələ ortada heç nə yoxdu. Artıq məşqçi olduğuma görə özümü pis hiss edirəm. Nə yalan deyim, iyrənirəm. Amma əlimdən nəsə gəlmir. Mənim peşəm budu. Başqa nə iş görüm”.
Elnar bəy “Şamaxı”dan ayrılandan sonra başqa klublardan təklif alıb-almadığına da aydınlıq gətirdi:
“Bəli, bir neçə komandayla danışıq aparıram. Lakin konkret razılıq əldə etdiyim hansısa klub yoxdu”.
Bu arada “şirlər” bir neçə gündü baş məşqçi postu üçün danışıq apardığı Ayxan Abbasovla müzakirələrin düyünə düşdüyü haqda xəbərlər yayılıb. İddialara görə, buna məhz klubda yaşanan maliyyə sıxıntısı səbəb olub. Məsələni aydınlaşdırmaq üçün əlaqə saxladığımız Ayxan bəy nəinki bilgini təkzib etdi, razılığın əldə olunduğunu açıqladı:
“Hansısa yubanmadan söhbət getmir. “Şamaxı” yeni klubdu. Maliyyə sıxıntılarını böyütmək lazım deyil. Müzakirələrin uzanmasının səbəbi şəxsi işlərlə bağlı başımın qarışıq olmasıydı. Çox güman, sabah rəhbərliklə görüşümüz olacaq. Qərarımı müsbət yöndə qətiləşdirdiyimdən müqavilə imzalayacağıq”.
Bilindiyi kimi, komanda üçün aktual mövzulardan biri də heyətə legionerlərin cəlb edilib-edilməyəcəyidi. Əldə etdiyimiz bilgiyə görə, yeni baş məşqçi əcnəbi futbolçularla çalışmaq niyyətindədi və bunu “Şamaxı” rəhbərliyini çatdırıb. Müsbət cavab alan mütəxəssisin növbəti addımı “Turan Tovuz”da səmimi münasibəti olan əcnəbiləri yeni kollektivinə dəvət etmək olacaq. Ayxan bəyin bu məsələyə reaksiyası belə oldu:
“Hələ ki legionerlərin xidmətindən istifadə edib-etməyəcəyimiz dəqiq deyil. Lakin rəhbərlik bu yöndə qərar versə, tanıdığım futbolçuları komandaya cəlb edə bilərəm”.
KƏNAN BAHADIR
Digər xəbərlər
