“İki həftəyə yaxındı bu istiqamətdə çalışmalara start vermişik. Xeyli iş görmüşük. İşıqlandırma və akademiya binasının sənədləri hazırlanıb. Əvvəlki dirəkləri demontaj etmişik. Yeniləri də gəlib. Artıq stadiondadı. Dirəklərin yerləşdirməsiylə bağlı işlər davam edir. Briqadalar iyulun ortalarına qədər işıqlandırmanı hazır vəziyyətə gətirəcək. Akademiya binasının tikilişinə başlamışıq. İndi çardaq qurulur. On gün ərzində üstübağlı binamız hazır olacaq. İşlər sürətlə irəliləyir. Yeni mövsüm üçün hazırlaşırıq. Əvvəlki binanın çatışmayan cəhətləri də aradan qaldırılır. Sökülüb yenidən tikilməli və rənglənməli yerlər hazır vəziyyətə gətirilir. Meydançanın dəyişdirilməsinə gəlincə, bu gün bu mövzu haqda iclas keçirdik. Təxminən iki-üç gün ərzində yekun qərar veriləcək. Hazırda danışıq apardığımız şirkət mövsüm başlayana qədər işi bitirə biləcəyini desə, dərhal başlayacağıq”.

“İcazə verin, bu məsələni izah edim. Biz üç meydança düzəltmək istəyirdik. Çünki ötən mövsüm həm akademiya, həm əvəzedicilər, həm də əsas heyətimiz məşq və oyunlarını cəmi bir meydançada keçdi. Nəticədə qazon yükləndi. Düşündük ki, indiki əsas meydançaya təbii ot örtüyü quraşdıraq. Yeni aldığımız torpaqda süni qazonla təchiz edilmiş meydança düzəldib başqa kollektivləri ora yönəldək. Üçüncü meydançada isə məşqlər keçirilsin. Bununla bağlı AFFA-ya həm şifahi, həm də yazılı müraciət etdik ki, kömək etsinlər. Hətta üz-üzə gələndə də xahişimizi dilə gətirdik. Təəssüf ki, bütün cəhdlərimiz cavabsız qaldı. İndi məcburuq ki, meydançalardan birinin işini təxirə salaq. Sadəcə, əsas komandanın oyunlarını keçirəcəyi stadionun ot örtüyünü təbiiylə əvəz edib yeni tikiləcək yerdə süni qazondan istifadə edəcəyik. Ümumiyyətlə, nəzərə almalıyıq ki, üçmərtəbəli akademiya binasının inşası və işıqlandırma sistemlərinin quraşdırılması çox böyük maliyyə tələb edir. “Turan Tovuz” üçün bunları etməyə çalışacağıq. Alınmasa, məcburuq ki, növbəti ilə və ya başqa vaxta qədər təxirə salaq. Bilinməli idi ki, Tovuzda, sadəcə, biz yox, həm də premyer-liqanın doqquz klubu çıxış edəcək. Onların da rahatlığı, öz oyun tərzini istədikləri kimi göstərmələri üçün müəyyən kömək edilsə, yaxşı olardı”.