“Sadəcə, instansiyalardan biri sənədlə bağlı çatışmazlıqların olduğunu dedi”
Dünən sportinfo.az saytında diqqəti çəkən məlumat yayıldı.
İddialara inansaq, AFFA ilə “Turan Tovuz” arasında növbəti problem yaranıb. Belə ki, stadionun ərazisində tikilən yeni akademiya binasında görülən işlər bir daha dayandırılıb. Klubun İdarə Heyətinin sədri Ehtiram Quliyevin öz hesabına inşa etdiyi obyektin qapıları federasiyanın göstərişi ilə bağlanıb. Halbuki orda son tamamlanma işləri görülürdü və yaxın günlərdə istifadəyə verilməsi gözlənilirdi. İnformasiyanın doğru olub-olmadığını dəqiqləşdirmək məqsədi ilə öncə AFFA-nın mətbuat xidmətinin rəhbəri Elnur Məmmədli ilə əlaqə saxladıq:
“Bu məsələnin, ümumiyyətlə, AFFA-ya aidiyyatı yoxdu. Akademiyanı klub özü tikirdi. AFFA-nın məsələdə heç bir maneçiliyi, müdaxiləsi olmayıb”.
Bəs akademiyada görülən işlərə fasilə verilməsinin əsl səbəbi nədi? Bu sualla “Turan Tovuz”un idarə heyətinin sədr müavini, infrastruktur və malliyyə üzrə direktor Əli Babakişiyevə müraciət etdik:
“Bəli, işlər dayandırılıb. Çünki həll olunmayan xırda problemlər var idi. Bilindiyi kimi, şirkət binanı öz vəsaiti ilə inşa edir. Yəni burda hansısa ikinci tərəfin müdaxiləsinə ehtiyac olmur. Sadəcə, instansiyalardan biri sənədlə bağlı çatışmazlıqların olduğunu dedi. Hazırda bu problemin aradan qaldırılması istiqamətində işlər görülür. Təxminən 10-20 gün ərzində məsələ həllini tapacaq. Yenə qeyd edirəm ki AFFA-nın bu məsələ ilə heç bir əlaqəsi yoxdu”.
GÜNAY SÜLEYMANOVA
Digər xəbərlər
