Səbuhi Səfiyarlı: “AFFA-nın ötən mövsüm üçün ayırdığı pul hələ bitməyib”
Mövsümü başa vurub bir müddət dincələn klublar qarşıdan gələn “futbol ili” üçün hazırlığa başlamaq ərəfəsindədi. Artıq fəaliyyətini 1-ci liqada davam etdirəcək “Qəbələ” isə işə stadiondan başlayıb. Belə ki, fasiləni fürsət bilən “qırmızı-qaralar” əsas meydanın qazonunu dəyişməyi qərara alıb. Köhnə qazon tam götürülüb. Əvəzində yeni, daha keyfiyyətli qazon yerləşdirməyi planlaşdırırlar.
Bu sırada diqqətimizi çəkən məqam maaliyyə məsələsi oldu. Xatırlayırsızsa, AFFA “Qəbələ” üçün cəmi 700 min manat ayırıb. Üstəlik aşağı liqada mübarizə aparacaq komanda belə çox pul tələb edən işi görməyə niyə ehtiyac duyur – bunu da anlamadıq.
Bütün bunlara aydınlıq gətirmək üçün “Qəbələ”nin idman direktoru Səbuhi Səfiyarlı ilə əlaqə saxladıq. Səbuhi bəy qazonun necə, hansı səbəbdən dəyişdirilməsinə dair bunları söylədi:
“Digər məşq meydançalarını yeniləyirdik. Əsas meydança isə 9 il əvvəl qoyulmuşdu. İmkan edib yeniləyə bilmirdik. Müalicə ilə birtəhər oyunları keçirirdik. Amma gördük ki, dəyişməyin vaxtıdı. Bilirsiz ki, yeni şirkətlə əməkdaşlığa başlamışıq. Mütəxəssislərin analizindən sonra belə qərara gəldik. Həm də artıq bu işi görməyə vaxtımız var. Yəqin ki, uzağı iyulun axırına qədər bitəcək. Bu işə çox maliyyə sərf olunmayıb. Çünki öz hesabımıza edirik. Hələ ötənilki büdcəmiz qurtarmayıb, özümüzdə var. Yəni ötən mövsüm AFFA-nın ayırdığı pullar hələ bitməyib. İyula qədər ödəniləcək. Hər şey planla gedir”.
Xatırladaq ki, Qəbələ şəhər stadionunun meydançalarının ot örtüyünə nəzarət edən şirkət “Caspian Sport & Landscape”di. Azərbaycanda yeni fəaliyyət göstərən şirkət qışdan klubla tərəfdaşlığa başlayıb. Şirkətin baş aqronomu - tanınmış mütəxəssis Filip Şarples vaxtilə Qəbələ şəhər stadionunda təbii ot örtükləri üzrə baş mütəxəssis kimi fəaliyyət göstərib.
RÖYANƏ OĞUZ
Digər xəbərlər
