Bəzi Türkiyə klubları ilə bağlı məşqçi xəbərləri var.
“Football-plus.az” xəbər verir ki, elitanı tərk edən “Ankaragücü” Əmrə Belözoğlu ilə yollarını ayırmışdısa, eyni addımı “Pendikspor” da atdı. Tarixində ilk dəfə iştirak etdiyi superliqanı 19-cu pillədə tamamlayan İstanbul təmsilçisi İbrahim Üzülməzlə vidalaşmaq qərarına gəlib. Üzülməzin “Pendikspor” macərası cəmi 11 oyun çəkib. Amma “Qaziantep” və “Çaykur Rizəpor” indiki məşqçilərlə yola davam etməyə qərar veriblər. Antep təmsilçisi martın əvvəllərində Səlcuk İnanla anlaşmışdı. 39 yaşlı mütəxəssis qarşısına qoyulan hədəfə çataraq komandanı elitada saxlamağı bacardı. Bu üzdən “Qaziantep” rəhbərliyi dəyişikliyə ehtiyac görməyib. Eyni şəkildə “Çaykur Rizəspor” da İlhan Palutla birillik yeni müqavilə imzalayıb. Rizə təmsilçisi ötən mövsüm bir ara hətta 5-ci pilləyə qədər yüksəlmiş və avrokuboklara vəsiqəyə iddia etmişdi. Amma komanda sonda mövsümü 9-cu pillədə başa vurdu. İlhan Palut 2023/24-də superliqada bir klubun başında əvvəldən sona qədər tab gətirən cəmi 4 məşqçidən biri oldu. Palutdan başqa Okan Buruk “Qalatasaray”da, İsmayıl Kartal “Fənərbaxça”da və Volkan Dəmirəl “Hatayspor”da əvvəldən sona qədər çalışa bildi.

Bu arada Türkiyədə ən diqqətçəkən məşqçi təyinatı “Amedspor”da yaşanıb. 2-ci liqanı, yəni 3-cü divizionu çempion kimi tamamlayaraq tarixində ilk dəfə 1-ci liqaya yüksələn Diyarbəkir təmsilçisi ölkənin ən tanınmış mütəxəssislərindən olan Ərsun Yanalla anlaşıb! 62 yaşlı çalışdırıcı ilə “1+1” illik müqavilə imzalanıb. “Amedspor” Yanaldan öncə digər təcrübəli məşqçi Rza Çalımbaya da təklif göndərmişdi. Amma tərəflər son anda anlaşa bilməmişdilər. “Amedspor”un prezidenti Əziz Elaldı Yanala tərif yağdıraraq onun fəlsəfəsinin komandasının fəlsəfəsi ilə üst-üstə düşdüyünü vurğulayıb. O “əldə etdiyi uğurlar, qazandığı titullar, yetişdirdiyi ulduzlar və məşqçilərlə futbolumuzda hər zaman xüsusi çəkisi olan Yanal ilə başladığımız bu yeni yolun həyəcanını yaşayırıq” açıqlamasını verib. Qeyd edək ki, “Dənizlispor”, “Ankaragücü”, “Gənclərbirliyi”, “Manisaspor”, “Trabzonspor”, “Əskişəhərspor”, “Fənərbaxça”, “Antalyaspor” və Türkiyə yığmasını çalışdırmış Yanal son olaraq ötən mövsümün gedişində “Alanyaspor”da işləmişdi. Amma onun bu klubdakı macərası cəmi iki ay çəkmiş və Yanal 2023-ün aprelin 19-da istefaya göndərilmişdi. Tanınmış məşqçi geridə qoyduğumuz mövsüm şərhçi kimi fəaliyyət göstərərək “Bein Sports”da işləmişdi. Ərsun Yanalın karyerasının ən böyük uğuru 2013/14-də “Fənərbaxça” ilə qazandığı superliqa çempionluğudu. Bu, həm də “sarı-lacivərdlilər”in indiyə qədər qazandığı son çempionluqdu.