Lunyovun gedişi birmənalı qarşılanmadı: “Nə edirsiz-edin, təki Şahruddini geri gətirməyin”
Bilindiyi kimi, “Qarabağ” srağagün rusiyalı qapıçı Andrey Lunyovla vidalaşdı.
Bu həm də ötən mövsümün əvvəlində futbolçuyla imzalanan “1+1” illik müqavilənin yenilənməməsi deməkdi. Düzü, qolkiperin həm Azərbaycan, həm də Avropa səviyyəsində uğurlu olduğunu demək mümkündü. Hər halda, onun “köhlən atlar”ın şərəfini qoruduğu müddətdəki göstəriciləri haqda dəfələrlə yazmışıq. Amma çatışmazlıqları da az deyil. Qısası, o, sabit çıxış etməkdə çətinlik çəkən qapıçılardandı. Təbii ki, bu üzdən hansısa matçda ciddi sınaqlardan üzüağ çıxsa belə, növbəti oyunda yol verdiyi səhvlər bir çox uğurunun kölgədə qalmasıyla nəticələnir. Belədə onun haqda konkret fikir yürütmək də xeyli çətin olur. Adam bilmir üstünlüklərinə görə tərifləsin, yoxsa çatışmazlıqlarını göz önünə gətirib mühakimə etsin. Reallıq odu ki, “Qarabağ” azarkeşləri hazırda onun gedişi ilə bağlı fərqli düşüncədədi. Gedişinə görə üzülənlər də var, “nəhayət, canımız qurtardı” deyib sevinənlər də. Və ikincilərin sayının daha çox olması sirr deyil. Bunu “Qarabağ”ın qapıçının yola salındığını elan etdiyi, sosial şəbəkə hesabında yer alan paylaşımın “rəy” bölməsində yazılanlardan anlamaq olur. Hansı fikirlərin səsləndirildiyini öyrənmək istəyirsizmi? Görək, “Qarabağ” tərəfdarları Lunyovun gedişini necə qarşılayıb?
Ələddin Rüstəmli:
“Braqa” və “Bayer-04” ilə oyunlarda çox kobud səhvlərə yol verdi. Şahruddinin gözlənilməz səhvləri olmasa, Lunyovdan qat-qat güclü qapıçıdı. “Qarabağ” “Zirə”nin qolkiperini alsa, yaxşı olar. Lunyovu itki saymaq gülüncdü”.
Şahin Ələkbər:
“Qarabağ”ın ən yaxşı dönəmində heyətdə yer aldın. Buna görə həmişə xatırlanacaqsan. Amma böyük oyunlar üçün hazır deyilsən, Lunyov! Daha güclü qapıçıya ehtiyacımız var”.
Cavid Ramazanov:
“İstənilən halda sənə təşəkkür edirik, Lunyov! Həlledici oyunlarda özgüvənli çıxışınla diqqəti çəkdin. “Braqa” və “Bayer-04” kimi rəqiblərdən çəkinmədin. Səni həmişə yaxşı xatırlayacağıq”.
Ceyhun Abbaslı: “Bizi “Şahruddin sindromu”ndan xilas edib “Qarabağ”ın uğurlarında pay sahibi olduğun üçün təşəkkür edirik, Lunyov”.
Ceyhun Abbaslı: “Bizi “Şahruddin sindromu”ndan xilas edib “Qarabağ”ın uğurlarında pay sahibi olduğun üçün təşəkkür edirik, Lunyov”.
Vüqar İmanov:
“O qədər də güclü qapıçı deyil. Lakin o gələndən sonra futbolçularda özünəinam artdı. Daha rahat şəkildə irəli atıla bilirdilər. Bu, futbolda çox vacibdi”.
Şahmar Müəllim:
“Nə edirsiz-edin, təki Şahruddini geri gətirməyin. Baxmayaraq ki, “Şah” Lunyovdan daha güclü qapıçıdı.
Vüqar Hüseynov:
“Qurtarışıyla hansısa oyunun taleyini həll etmədi. Sıradan bir qapıçı idi. Nə çox kobud səhvi oldu, nə də qeyri-adi seyvi”.
Cavid Məmmədov:
“Əvvəl çox gözəl başladı. Düşünürdüm ki, “Qarabağ” artıq qapıçı problemini həll etdi. Lakin sonradan başlayan eniş dalğasının önünə kəsmək mümkün olmadı. Lunyov toparlanmaqda çətinlik çəkdi. Sanki klubdan ayrılmaq istəyirdi”.
Ağabala Kərimli:
“Lunyov Şahruddinin səhvlərini təkrarlamırdı deyə güclü kimi göründü. Amma “Şah”ın seyvlərinin heç birini təkrarlaya bilmədi. Ortabab qapıçıdı”.
Babək Rüstəmzadə:
“Allah yolunu açıq eləsin, amma oyundakı xarakteri xoşuma gəlmirdi. Kollektivə qarşı soyuq idi. “Qarabağ”da indiyə qədər çox futbolçu forma geyib. Lakin Lunyov qədər soyuqqanlısını ilk dəfə gördük. Komandanın “Braqa” və “Bayer-04”ə qarşı oyunlarda qazandığı uğurlar zamanı qeydə alınan kadrlara baxın. Hamı sevinir, Lunyov isə buz kimi! Belə mənzərə “Qarabağ” azarkeşləri üçün xoş deyildi”.
Kənan Qurbanlı:
“Lunyov komandaya bağlana bilmədi. Uyğunlaşmağa çalışmadı. Sanki günlərini sayırdı...”
Gündüz Eldaroğlu:
“Düzgün qərardı. Bəzi davranışları “Qarabağ”a yaraşmırdı. Ayrılması yaxşı oldu...”
“Qarabağ”ın Çempion Liqasında mübarizəyə 2-ci təsnifat mərhələsindən başlayacağını bilirik. Bu, ağdamlıların qrupa düşmək ehtimalını artırır. Və “köhlən atlar” Avropada ötən mövsümdəkindən daha irəli getmək istəyirsə, tarixinin ən güclü qapıçısını gətirməyə məcburdu. Görəsən, Qurban Qurbanov nə düşünür? Bunu bilmək üçün bir neçə gün gözləməyə dəyər!
KƏNAN BAHADIR
Digər xəbərlər
