“Səsli mesajdan bir az daha artığına layiq idim” - Lunyovun agenti qəzəbli vida mesajı yaydı
“Qarabağ”ın əksər futbolçularının adı xarici klublarla yanaşı halanır.
Mövsümün sonuna az qaldığına görə belə xəbərlərin sayı artmaqdadı. Hazırda “köhlən atlar”ın təcrübəli qapıçısı Andrey Lunyovla bağlı yeni iddialar var. Belə ki, 32 yaşlı qapıçıya ölkəsinin bir neçə klubu maraq göstərir. “Zenit”, “Spartak” və “Dinamo”nun adı çəkilir.
Maraq üçün bildirək ki, Andreyin “Qarabağ”la “1+1 il” sxemi ilə bağladığı müqavilənin vaxtı 2025-ci ildə başa çatacaq. Aprelin əvvəlində Azərbaycan mediasında onun Ağdam klubundan maaşının üçqat artırılmasını (indiki 200 min dolların 600 min olmasını istəyirdi) tələb etməsi ilə bağlı yayılan xəbər aranı qarışdırdı. Andreyin meneceri Anton Smirnov bu məlumatların mediaya sızmasına görə “Qarabağ”ı təndid etdi. Srağagün isə Smirnov “teleqram” kanalında qapıçı ilə əməkdaşlığı dayandırdığını yazıb:
“İndicə Andrey Lunyovdan əməkdaşlığımızın dayandırılması barədə mesaj aldım. Hesab edirəm ki, bu addım çoxdan atılmalıydı. Bu Andreyin qərarıdı, qəbul edirəm. Üç ildən artıq olan əməkdaşlıq haqqında deyiləcək çox şey var. Hətta düşünürəm ki, bu haqda kitab yaza bilərəm. Bəlkə bir gün bunu edəcəm. Həyatımın və fəaliyyətimin bu dövrünə minnətdarlıqdan başqa heç nəyim yoxdu. Birlikdə çox şey yaşadıq. Buna hörmət var. Amma hansısa mərhələdə münasibətlər öz faydalılığını keçdi. Geriyə baxıb bu hekayəyə Andreyə sədaqətlə xidmət etdiyim böyük bir təcrübə, həyat parçası kimi baxmaqdan utanmıram. Karyerasını maneəsiz davam etdirmək Andrey üçün daha yaxşı olacaq. Əminəm ki, məhz bu mövqeyi müdafiə edən və Andreyi bu yola çəkən məsləhətçilər olub. Andrey isə onlara qulaq asdı. Buna onun hüququ var. Hazırda Andreyə açıq şəkildə demək istədiyim yeganə söz budu: yəqin ki, təvazökarlıqla deyəcəm, bütün bu müddət ərzində səsli mesajdan bir az daha artığına layiq idim. Beləliklə, uğurlar, Andrey, yeni zirvələrə! İstər “Qarabağ”da, istərsə də başqa klubda – bu, artıq o qədər də vacib deyil”.
Heç şübhəsiz, Lunyovun qərarına ötən ay agentlə “Qarabağ” arasında yaşanan münaqişə də təsir edib. Bütün bu məlumatlarla bağlı Antonla əlaqə yaratmağa çalışdıq. Çoxsaylı cəhdlərimizə baxmayaraq, onun fikirlərini öyrənmək bizə nəsib olmadı. Cavabsız suallar isə daha da artdl. Lunyov ilin-günün bu vaxtı Smirnovla niyə sağollaşdı? Burda “Qarabağ”ın rolu olubmu? Aranı qarışdıran qüvvələr kimdi? Necə deyərlər, od olmasa, tüstü çıxmaz. Gec-tez hər şey ortaya çıxacaq.
RÖYANƏ OĞUZ
