“Doğrusu, birinci oyunda da xal qazanmaq istəyirdik. Lakin təəssüf ki, Ərzincandan xalsız döndük. Bir də sıxıntımız orda hakimlərin verdiyi problemli qərarlarla bağlı idi. Buna baxmayaraq, 1-ci hissədə olmasa da, 2-ci yarıda komanda şəklində çox yaxşı mübarizə aparmışdıq. Bu qarşılaşmaya gəlincə, bizə heç 1 xal da sərf etmirdi. Bu üzdən qalib gəlməyə məcbur idik. Ona görə də bütün qüvvəmizlə bu görüşə köklənmişdik. Bu görüşə fərqli sistemlə çıxdıq. Hər iki hissədə fərqli sistemlə oynadıq. Həm də təhlil etdik ki, rəqibin müəyyən boşluqları var, həmin boşluqlardan necə yararlana bilərik. Doğrudan da, oyun baxımından komanda kimi biz daha yaxşı mübarizə apardıq. Qızlarımıza təşəkkür düşür. Nəinki yaxşı mübarizə apardıq, ümumiyyətlə, möhtəşəm xarakter və əzmkarlıq göstərdik. Son saniyələrə qədər meydanda vuruşan Azərbaycan milli komandası var idi. Matçın sonunda da ortaya gözəl bir nəticə çıxdı. Qrupdakı digər oyunun nəticəsinə gəlincə, çox üzüldüm. Nəyə görə? Düşünürdük ki, İsveçrə Macarıstandan da 3 xal alar. Onda Macarıstanda 1, bizdə 4 xal olurdu və bu nəticə pley-offa getmək şansımızı artırırdı. Amma bu futboldu, burda hər şey olur. Macarıstan 1:0 hesabla qələbə qazandı, İsveçrənin uzatma dəqiqələrində penalti şansı da var idi. Qola çevirsəydilər, yenə də bizim üçün çox yaxşı nəticə sayılırdı. Fəqət onlar bu fürsətdən yararlana bilmədilər. Doğrudan da, buna görə üzüldüm. Amma yenə deyirəm, sadəcə, önümüzə baxmalıyıq. İyulun 12-də evdə Macarıstanla çox önəmli görüşümüz var. İnşallah, çalışacağıq ki, maksimum nəticə qazanaq. Həqiqətən də 3 xal ala bilmək üçün əlimizdən gələnin daha artığını edəcəyik. Çünki qalib gələcəyimiz halda pley-off şanslarımız daha çox olur. Kəsəsi, 3 xala köklənmişik. Fürsətdən istifadə edib, sizin vasitənizlə azarkeşlərə səslənirəm. Ayın 12-si komandanı tək qoymasınlar, tribunada olsunlar. Türkiyə ilə matçda məhdud azarkeş kütləsi var idi. Amma həmin azarkeşlər həqiqətən də bizim üçün önəmli rol oynadı. Onlar 12-ci oyunçu funksiyasını yerinə yetirərək, son ana qədər bizi dəstəklədi. Bu isə bizə çox kömək oldu. Ümid edirəm ki, 12-də keçiriləcək qarşılaşmada daha çox azarkeş olacaq və bu məqam qələbəmizə kömək edəcək”.

“Türkiyə ilə oyun çox yaxşı keçdi. Qələbə qazandığımıza görə çox sevinirik. Qələbə qolunu vurduğuma görə də çox xoşbəxtəm. Düşünürəm ki, Türkiyə yığmasına səfərdəki matçda da qalib gələ bilərdik. Sadəcə, əlimizə düşən şanslardan yararlana bilmədik. Bir səhv ucbatından məğlub olduq. Bakıya qayıdanda səhvlərimiz üzərində çalışdıq. Öz oyunumuzu və rəqibi təhlil etdik. Dünənki oyunda nələri bacardığımızı hər kəsə göstərdik. Özümə və komandama inanırdım. Macarıstan ve İsveçrə ilə oyunlar bizim üçün çox önəmlidi. Çalışacağıq ki, məğlub olmayaq. Hesab edirəm ki, macarlardan xal götürə bilərik. Qrupdan çıxmaq şansımız böyükdü. Bunun üçün nə lazımdırsa, onu da edəcəyik. Əlimizdən gələn heç bir şeyi əsirgəməyəcəyik”.