Türkiyə yığması AÇ-2024-ə hazırlıq çərçivəsində bu gün səfərdə İtaliya yığması ilə qarşılaşacaq.

“Football-plus.az” xəbər verir ki, Bolonya şəhərində keçiriləcək oyun Bakı vaxtı ilə saat 23.00-da başlayacaq. ''Ay-ulduzlular'' bir ilkə imza atmağa çalışacaqlar. Belə ki, qardaş ölkənin komandası tarixi ərzində heç vaxt İtaliyanı məğlub edə bilməyib! Türkiyə ilə İtaliya bu günə qədər əsas yığmalar səviyyəsində 12 dəfə qarşılaşıb. İtalyanlar 9 qələbə qazanıbsa, daha 3 görüşdə bərabərlik qeydə alınıb. Türkiyə bu oyunlarda 7 qol vurubsa, öz qapısından 24 top buraxıb. Maraqlıdı ki, Türkiyə İtaliyaya qarşı ən böyükhesablı məğlubiyyəti məhz bu gün qarşılaşacaqları Bolonya şəhərində yaşayıb. 1962-ci ilin dekabrında, AÇ-1964-ün seçmə mərhələsi çərçivəsində Türkiyə Bolonyada 6 cavabsız qol buraxmışdı. Onu da vurğulayaq ki, İtaliya Türkiyənin tarixi ərzində ən azı iki dəfə qarşılaşıb məğlub edə bilmədiyi 5 komandadan biridi. Bu siyahıya İtaliyadan başqa Qana (2 oyun, 2 bərabərlik), Serbiya (2 oyun, 2 bərabərlik), Braziliya (6 oyun, 2 heç-heçə, 4 məğlubiyyət) və İngiltərə (11 oyun, 2 heç-heçə, 9 məğlubiyyət) daxildi.

ƏLİ