AÇ-2024-ün seçmə mərhələsinə uğurlu start verərək İrəvanda Ermənistanı məğlub edən Türkiyə bu gün 2-ci oyununa çıxacaq.

"Football-plus.az" xəbər verir ki, qardaş ölkənin yığması öz meydanında qrupun ən güclü və iddialı komandası olan Xorvatiyanı qəbul edəcək.

Oyun Bursa şəhərindəki ''Böyükşəhər Bələdiyyə Stadionu''nda keçiriləcək. Bu stadionun qeyri-rəsmi adı isə ''Timsah Arena''dı. 43500 azarkeş tutumuna malik stadionda bu gün anşlaq olacağı gözlənilir. Bursalıların 11 illik həsrətinə son qoyulacaq. Belə ki, Türkiyə bu şəhərdə sonuncu dəfə 2012-ci ilin fevralın 29-da yoldaşlıq oyunu çərçivəsində Slovakiya ilə qarşılaşmış və 1:2 hesabı ilə uduzmuşdu.

Ümumilikdə Türkiyə indiyə qədər Bursada keçirdiyi 8 oyundan 3 qələbə, 2 heç-heçə, 3 məğlubiyyətlə ayrılıb. Amma məğlubiyyətlərin hamısı yoldaşlıq oyunlarında qeydə alınıb. Rəsmi matçlarda isə Türkiyənin bu şəhərdə heç vaxt ''kürəyi yerə dəyməyib'' (3 qələbə, 2 heç-heçə)! Ötən əsrin sonlarında ''ay-ulduzlular'' hər iki tarixi qələbəni məhz bu şəhərdə əldə etmişdilər.

Bursada DÇ-1998-in seçmə mərhələsində Niderland, AÇ-2000-nin seçmə mərhələsində isə Almaniya üzərində 1:0-lıq zəfərlər əldə olunmuşdu. Konkret ''Böyükşəhər Bələdiyyə Stadionu''na gəlincə, bu arena 2015-də istifadəyə verilib və Türkiyə burda ilk oyununu keçirəcək. Xorvatlar türklər üçün uğursuz rəqib sayılır. Belə ki, bu komandalar arasında indiyə qədər 7-si rəsmi, 3-ü özəl olmaqla baş tutan 10 qarşılaşmanın cəmi 1-i Türkiyənin qələbəsi ilə yekunlaşıb (6 heç-heçə, 3 məğlubiyyət). Komandalar sonuncu dəfə 2020-nin noyabrında yoldaşlıq oyunu çərçivəsində İstanbulda qarşılaşmış və oyun 3:3-lük bərabərliklə bitmişdi.

Ümid edək ki, tarixi zəfərlərin məkanı Bursada bu gün daha bir tarix yazılacaq.

ƏLİ