"Bu günkü final oyununda komandalar bir-birindən üstün deyil. Artıq şanslar bərabərdi. "Zirə" müdafiə futbolu, "Qarabağ" isə hücumda təzyiq göstərir. Lakin son oyunlarda "köhlən atlar"da bu elədə hiss olunmur. Bildiyim qədər Qurban Qurbanov çalışır ki, hər iki titula sahib çıxsın. Rəşad da ikinci yeri qazandığı kimi, kuboku da əldə etmək istəyir. Bu oyunda kim səhv etməyəcəksə, o da qalib gələcək. 2 il öncə də qarşılaşanda oyun heç-heçə bitmişdi və penaltilər seriyasında "Qarabağ" qalib gəlmişdi. Bu gün də eyni ssenari ola bilər. Ancaq ümumilikdə götürdükdə "Qarabağ"ın oyunçularının potensialı daha üstündü. Fərdi ustalıq səviyyəsi olan futbolçular çoxdu. Hücum xəttində fərdi ustalıqdan daha çox istifadə olunur. Bu baxımdan da hər oyunda daha çox qol epizodları yaradırlar və çalışırlar ki, bu epizodların 50 faizdən çoxu istifadə olunsun. "Zirə"də isə bu baxımdan kasadlıqdı. Onlarda komanda oyunu daha çox gözə çarpır. Bu da əsasən müdafiədən oyun quruluşudu. İnanmıram ki, "qartallar" bu oyunda sırf hücum futbolu oynasın. Çünki demək olar ki, bütün çempionat boyu müdafiədən oynayıblar. Rəşad Sadıqovun o riskə gedəcəyinə, açıq futbol oynadacağına inanmıram. Məncə, qapalı futbol oynayacaqlar. Bu zaman da Ağdam təmsilçisinin qol vurmaq imkanları sıfıra enir. Hər halda, bu gün maraqlı oyun izləyə bilərik. Bir komanda müdafiəsinin möhkəm olması, digərinin isə hücumdakı futbolçularının potensialının yüksək olması oyunu daha da maraqlı edəcək.

Dediyim kimi, şansları bərabər qiymətləndirirəm. Ola bilər ki, oyun minimal hesabla bitsin və ya penaltilər seriyasına getsin. Burda kimisə önə çıxarmaq çətindi. Kim layiqdirsə, o da kuboku qazanacaq".