Dünən Səudiyyə Ərəbistanında mövsümə kubokun final oyunu ilə yekun vuruldu.

“Football-plus.az” xəbər verir ki, həlledici görüşdə iki prinsipial rəqib - Kriştiano Ronaldonun şərəfini qoruduğu ''Əl-Nəsr'' ilə bu mövsüm bir sıra rekordlara imza atan və məğlub olmadan çempionluğu qazanan ''Əl-Hilal'' qarşılaşdı. ''Əl-Hilal'' əsas bombardiri Mitroviçin erkən qolu ilə hesabda önə keçdi. Bu azmış kimi ikinci hissənin əvvəllərində təcrübəli qapıçı Ospina cərimə meydançasından kənarda əllə oynadığı üçün qırmızı vərəqə alaraq ''Əl-Nəsr''i azlıqda qoydu. Hər şey Jorje Jezuşun komandasının qələbəsinə doğru gedərkən son anlarda vəziyyət dəyişdi. Ayman Yəhya bərabərlik vurdu. Üstəlik Əl-Bulayhi ilə Kulibalinin qırmızı vərəqə alması ilə ''Əl-Hilal'' meydanda 9 futbolçu ilə qaldı. Əlavə vaxtda oyun 9-a 10 davam etdi və qapılara qol vurulmayınca qalib penaltilər seriyasında müəyyənləşdi. Merakeşli qapıçı Bununun iki zərbəni dəf etdiyi penaltilər seriyasında ''Əl-Hilal'' 5:4 üstün olaraq aktivinə növbəti titulu yazdı. Matçdan sonra Kriştianonun əvvəlcə meydana uzanaraq, sonra da ehtiyat skamyada oturaraq göz yaşı axıtması diqqət çəkdi. Onu komanda yoldaşları sakitləşdirdi. Ronaldonun üzüntüsünü başa düşmək olar. Çünki o, yenə Səudiyyə Ərəbistanında mövsümü titulsuz başa vurdu və üstəlik yenə ''Əl-Hilal''ın qapısına yol tapa bilmədi. Kriştianonun transferindən bu yana Ər-Riyad təmsilçisi iştirak etdiyi 8 turnirin 7-də istəyinə çata bilməyib. Komanda yalnız ötən yay Ərəbistan Çempionlar Kuboku adlı turniri qazanıb. Özü də finalda məhz Ronaldonun qolları ilə ''Əl-Hilal'' üzərində qələbə qazanılıb. Amma dərd orasındadı ki, bu turnir rəsmi xarakter daşımır.

ƏLİ