“Zirə” çempionatın son turunda “Səbail” üzərində qələbə qazanarmaqla Avropa Liqasına vəsiqəni təmin etdi.

“Qartallar” yalnız “Qarabağ”dan geri qaldı ki, bu da anlaşılandı. Rəşad Sadıqovun qış “transfer pəncərəsi”ndə heyətə cəlb etdiyi oyunçulardan biri də Ceyhun Nuriyevdi. 23 yaşlı yarımmüdafiəçiylə klub 2,5 illik müqavilə imzaladı. Gəlişindən bir qədər sonra futbolçunun yeni komandasına uyğunlaşması və Rəşad Sadıqovun əsas oyunçularından biri olması onu daim diqqət mərkəzində saxlayır. Nuriyev həmçinin artrıq ikinci dəfə millinin yoldaşlıq oyunlarına da dəvət alıb.

- “Zirə” ilə ilk dəfə Avropa Liqasına vəsiqə qazandız. Bu necə bir hissdi?
- Məqsədimizə çatdığımıza görə çox xoşbəxtik. İnşallah, növbəti məqsəd təsnifat mərhələlərini uğurla keçib, Avropa Liqasının qrupuna düşməkdi.

- Ümumiyyətlə, avrokuboklara vəsiqə uğrunda gərgin mübarizə gedirdi. 2-ci pillənin sahibi kimi Avropaya gedə biləcəyinizə inanırdız?
- İnamımız həmişə yüksək olub. Hətta qışdan sonra olan uğursuz zolaqda belə inamımızı itirmədik.

- Demək olar ki, mövsümün ən önəmli hədəflərindən birinə çatdız. Bu nəticə “Qarabağ”la görüşünüzə necə təsir edəcək? Yəni titul üçün var qüvvənizlə mübarizə aparacaqsız, yoxsa artıq “Avropaya çıxışı təmin etmişik” düşüncəsiylə motivasiyanız aşağı düşəcək?
- Əsas məqsədə çatsaq da, mövsüm hələ bitməyib. Qazanacağımız kubok həm klubun ilk kuboku olacaq, həm də mənim. Motivasiyamız yüksəkdi, titul üçün var qüvvəmizlə mübarizə aparacağıq.

- “Qarabağ”ın futbolçuları da açıqlamalarında çox iddialıdılar. Onlar ölkə kubokunu da qazanacaqlarını bildirirlər.
- Biz öz oyunumuza köklənməli və qələbə qazanmalıyıq

- Geridə qoyduğumuz mövsümdə üzə çıxan gənc oyunçulardan birisən. Gələcək karyeranla bağlı nə düşünürsən?
- “Zirə” ilə ikiillik müqaviləm var. Burda xoşbəxtəm və milli fasilədən sonra özümü gələcək mövsümdə daha çox uğura hazırlayacam. Gələcəkdə nə olacaq, ona vaxtı gələndə qərar verəcəm.

- “Sabah”da o qədər də ön planda deyildin. Amma görünən odu ki, Rəşad Sadıqovun əsas oyunçularındansan. Ümumiyyətlə, Murad Musayevlə Rəşad Sadıqovu necə müqayisə edərdin? Hansı oxşar və fərqli cəhətləri var?
- Hər ikisinin oxşar cəhəti daim qələbə qazanmaq və ön pillələrdə olmaq hədəfidi. Fərqli cəhət oyun üslublarında və oyunçulara tələblərdə ola bilər. Ancaq onları birləşdirən hər ikisinin yüksək təhlil bacarığıdı.

- İctimaiyyət “Zirə”nin müdafiə futbolu oynadığını deyir. Rəşad Sadıqov bu fikirlə razılaşmasa belə, futbolsevərlər hücum xəttindəki məhsuldarlığın aşağı olduğunu əsas gətirir. Səncə, onlar haqlıdı, yoxsa Rəşad Sadıqov?
- Yalnız “Qarabağ”a qarşı oyunlarda qapalı, əks-hücumdan oynadığımız deyilə bilər. Qalan oyunlarda yetərincə hücumumuz olub. Az qol vurmağın səbəbinə gəlincə, bəzən qeyri-dəqiqlik və şanssızlıq olur. Qışdan sonra bu problemi bir qədər düzəltdik və daha da yaxşılaşdıracağıq.

- Qarşıda millinin oyunları var. Səncə, hər iki matçda qələbə qazanmaq şansınız var?
- Rəqiblər güclüdü. Albaniya Avropa çempionatında iştirak edəcək. Asan təslim olmayacağıq və meydana qələbə motivasiyası ilə çıxacağıq.

- Artıq bir müddətdi milliyə Arif Əsədov rəhbərlik edir və bu heyətdə özünə yer tapmısan. Səncə, yeni baş məşqçi təyinatından sonra heç nə dəyişməyəcək?
- İnşallah, dəyişməyəcək. Gələn mövsümdən etibarən daha da “artırıb”, yerimi qorumağa çalışacam.

KAMAL SƏFƏR