“Zirə”nin ilk qələbələri bəlkə də kiməsə adi nəticə kimi görünürdü. Ancaq Rəşad Sadıqovun komandası çempionun ardından vitse-çempionu da devirməklə bu mövsüm meydana ciddi iddia ilə atıldığını göstərdi. Bəs komandanın uğurlarının sirri nədədi?

1. Ötən mövsümdəki uğursuzluqlar
"Zirə" ötən mövsüm həm oyun planında, həm də nəticə baxımından qeyri-sabit idi. Komanda çempionatın gedişində əsasən yuxarı pillələrdə var-gəl etsə də, 4-cü dövrədə ardıcıl xal itkiləri, əsasən də "Qəbələ" ilə qarşıdurmalardakı uğursuzluq sonra “qartallar”ın 5-ci pilləyə düşməsinə gətirib çıxardı. Bura ölkə kubokundakı uğursuzluğu əlavə etsək, "Zirə" mövsümü əliboş bitirdi. Təbii ki, başda Rəşad Sadıqov olmaqla klub rəhbərliyi vacib qərarlar almalıydı. Rəhbərlik uğursuzluğa rəğmən, yola yığmanın sabiq kapitanıyla davam etməyə qərar verdi. İndi isə Sadıqov etimadı doğrultmalı, komandanı Avropaya daşımalıdı.

2. Komandanın yenidən qurulması
Rəşad Sadıqov müqaviləni yenilədikdən sonra ilk islahat kimi "yarpaq tökümü"nə start verdi. Qəsəbə təmsilçisindən 13 oyunçu yola salındı, əvəzində 11 yeni transfer gerçəkləşdi. Onlar arasında "Qəbələ"də özünü yaxşı tərəfdən göstərən Məqsəd İsayevlə Ruan Renato da var idi. Klub Türkiyə toplanışı zamanı heyətini tam komplektləşdirə bilməsə də, çempionatda oyundan-oyuna möhkəmlənməkdədi. Həmçinin ilk turda səfərdə "Qarabağ" üzərində qazanılan qələbə onlarda özünəinamı daha da artırdı. "Sabah" üzərində qələbə isə artıq müəyyən qənaətə gəlməyə əsas verir.

3. Əsas rəqiblərin iki cəbhədə savaşması
"Zirə"nin qarşısına qoyduğu əsas hədəf Konfrans Liqasına vəsiqə qazanmaqdı. Bu yolda əsas rəqiblər "Qarabağ", "Sabah", "Neftçi" və "Qəbələ"di. Sadalananların hər biri toplanışa tez start verməklə avrokuboklara qoşuldu. "Qırmızı-qaralar" xaric, qalanı ilk mərhələni uğurla keçdi. Hazırda isə yalnız Ağdam təmsilçisi yola davam etməkdi. Qısası, komandaların iki cəbhədə döyüşməsi "Zirə" üçün üstünlükdü.

4. Futbolçuların inkişafda maraqlı olması
Ötən mövsümün ardından "Zirə"dən 13 futbolçunun getdiyini, əvəzində 11 yeni oyunçunun komandaya cəlb olunduğunu yuxarıda vurğuladıq. İstənilən "yarpaq tökümü”nünü kluba ziyanı da var, xeyri də. Yəni gedənlərin yerini doldurulması, oyunçuların uyğunlaşması və başqa bu kimi məsələlər zamanla yoluna düşür. Son 4 oyuna nəzər salsaq, "Zirə"də "yarpaq tökümü"nün ziyanı gözə dəymədi. Deməli, yenilər komandanın dəyişməz "11-liy"ində yer almaq üçün çarpışır. Əslində Rəşad Sadıqov üç futbolçunun getməsini heç istəməzdi. Söhbət Coşqun Diniyev, Cəlal Hüseynov və Hamidu Keytadan gedir. Hər üç oyunçu qəsəbə təmsilçisi sayəsində performansını artıraraq daha üstün liqalara və yaxşı klublara keçdi. Coşqun əvvəlcə atasının “sükanı arxasında” olduğu "Səbail"ə transfer olunsa da, sonda Türkiyə 1-ci liqasındakı "Ümraniyyəspor"a keçdi. Cəlal artıq icarədə oynamaqdan doyduğunu vurğulayıb Bolqarıstanda legioner həyatı yaşamağı üstün tutdu. Keyta isə son çempion "Qarabağ"ın heyətinə qoşuldu. Bu futbolçuların keçidləri "Zirə"dəki digər oyunçuların, o cümlədən yeni transferlərin burda özlərini yaxşı tərəfdən göstərib daha güclü klublara və üstün liqalara keçid etmələri üçün stimul olacaq. Bu o deməkdi ki, artıq "qartallar"ın formasını geymək istəyənlər yalnız yüksək məvacibi yox, həm də karyerasındakı yüksəliş piləkənlərini də düşünəcək.

ABDULLA İSMAYILOĞLU