Dünən ölkə kubokunun 1/4 final mərhələsinə yekun vuruldu.

"Zirə" "Səbail"i, "Qarabağ" "Sabah"ı, "Qəbələ" "Araz-Naxçıvan"ı, "Neftçi" "Sumqayıt"ı mübarizədən kənarlaşdırdı. Beləliklə, yarımfinal cütləri bəllidi. Aprelin 2-si və 23-də "Zirə" ilə "Qəbələ"nin, "Qarabağ"la "Neftçi"nin oyunlarına şahidlik edəcəyik.

Bəs arxada qalan mərhələni necə dəyərləndirmək olar? Ümumi mənzərə, nəticələr, geridə qalanlar və irəliləyən komandaların gələcək taleyinə nəzər salaq.

"Zirə" - "Səbail" (2:1, 3:0)
"Zirə" həlledici matça çox yaxşı hazırlaşmışdı, belə demək mümkündüsə, əziyyətinin bəhrəsini gördü. Premyer-liqanın son 10 turunda 3 qol vuran "qartallar" kubokun cavab görüşündə eyni sayda fərqlənərək "Səbail"i məyus etdi. Rəşad Sadıqovun komandası ölkə çempionatında da iddiasını qoruyur. Ümumiyyətlə, qəsəbə təmsilçisi üçün uğurlu mövsümdü. Amma bunu "Səbail"ə aid etmək olmaz. "Dənizçilər"in turnir cədvəlindəki yeri narahatdı. Şahin Diniyev mövsümün birinci yarısı sona çatanda avrokubok hədəfini etiraf etmişdisə, indi əmin danışa bilmir. Durum belə davam etsə, necə olacaq? Yəqin ki, "Səbail" ötən mövsümün sonuncu turlarını yaxşı xatırlayır.

"Qarabağ" - "Sabah" (7:1, 3:4)
"Qarabağ"ın üç cəbhədə gərgin mübarizəsi fonunda göstərdiyi oyun, əldə etdiyi nəticələr şərhə əlyeri qoymur. "Sabah"ın durumu isə qəlizdi. Əlbəttə, "bayquşlar" cavab oyununda qələbə qazandı. Tərəflər oyunun həyəcanını son ana qədər qoruyub-saxladı. Amma ilk oyundan sonra mərhələ adlamaq üçün möcüzə lazım idi ki, o da olmadı. Hər halda, “Sabah”a çempionata daha ciddi yanaşıb Avropaya açılan qapının açarını axtarmaq lazımdı. Hələ ki ümid var.

"Qəbələ" - "Araz-Naxçıvan" (1:1, 2:0)
"Qəbələ"nin mərhələ adlamasını isə bir qədər sürpriz saymaq olar. Çünki premyer-liqada geridə qalan 21 matçda ciddi uğurla yadda qalmayan "qırmızı-qaralar" Muxtar Respublika təmsilçisinə məğlub olmadan siyahıdan sildi. "Araz-Naxçıvan"ın xaosu isə davam edir. Daha dəqiqi, dərinləşir. Konfrans Liqasına vəsiqə qazanmaq uğrunda mübarizədən qopmamağa çalışan "qırmızı-ağlar" istəkli oyun göstərsə də, nəticə yoxdu. Azər Bağırov uğursuz axarın kubok oyunlarına sıçramasında mane ola bilmədi ki, artıq hər şey geridə qaldı. Komanda var gücüylə premyer-liqa sınaqlarından üzüağ çıxmağa çalışmalıdı.

"Neftçi" - "Sumqayıt" (3:2, 1:1)
Premyer-liqanın ilk "dördlük" üzvlərini növbəti mərhələdə görə bilərdik ki, "Neftçi" buna imkan vermədi. Başqa yolu da yox idi. Tələbkar azarkeşlərin çempionluqdan əlini üzən komanda ən azı kubok uğrunda mübarizədə geri çəkilməməyə məcbur idi. "Sumqayıt" isə premyer-liqanın "yaxasından yapışmalı" olacaq. "Kimyaçılar" var gücüylə çalışmalıdı ki, gümüş medallar uğrunda mübarizəni davam etdirsin.

İndi də mövsümsonu təxminlərə nəzər salaq. Bəli, "Qarabağ" kuboka ən iddialı namizədidi. Amma çox güman, Çempionlar Liqasına vəsiqə qazanacağından çempionatın gümüş medalçısı üçün şans yaranacaq. Yəni kubokun qalibi ilə çempion eyni olanda premyer-liqada 2-ci yeri tutan Avropa Liqasının 1-ci təsnifat mərhələsinə vəsiqə qazanır. Təbii ki, bu qayda premyer-liqadakı gərginliyi daha da artırır. Belədə Samir Abasovun məhz bu üzdən kuboku qurban verib premyer-liqaya "sarılmasının” səbəbini anlamaq çətin deyil. Çox güman, baş məşqçi "Sumqayıt"ın kubok matçlarında onsuz da "Qarabağ" səddini keçə bilməyəcəyini anlayıb gümüş medallar uğrunda mübarizə aparmağı üstün tutdu. Yəni kubokun qalibinə veriləcək Avropa Liqasına vəsiqəni dolayı yolla premyer-liqada 2-ci yeri tutmaqla əldə etmək istəyir. "Qurban vermək" sözü isə planın mahiyyətini gizlətmək məqsədilə işlədilmiş ifadədi. Təbii ki, bu amil "Neftçi", "Zirə" və "Qəbələ" üçün siqnal olmalıdı. Onlar "Qarabağ"ı bu turnirdə hər vəchlə dayandırmağa çalışmalıdı ki, premyer-liqadakı işlərini çətinə salmasınlar.

KƏNAN BAHADIR