Enes Ünal “Bornmut”da qalası oldu
Türkiyə yığmasının üzvü Enes Ünaldan xəbər var.
Məlum olduğu kimi, son illərdə “Xetafe”nin heyətində vurduğu qollarla adından söz etdirən 27 yaşlı forvard cari mövsümün qış transfer dönəmində icarə əsasında premyer-liqa təmsilçisi “Bornmut”a yollanmışdı. İngilislər bu futbolçunu daimi əsasda transfer edə bilmək hüququnu da ələ keçirmişdilər. Klubdan verilən rəsmi açıqlamada həmin hüquqdan istifadə edildiyi qeyd olunub. Bunun üçün “Xetafe”yə 16 milyon avro ödənilib. “Bornmut” Eneslə dördillik müqavilə imzalayıb. İngiltərə klubunun icraçı direktoru Nill Bleyk bunları deyib:
“Enes klubumuzda olduğu dönəmdə göstərdiyi performansla həm bizim, həm də fanatlarımızın rəğbətini qazanmağı bacardı. Premyer-liqada uğur qazanmaq və özünü göstərmək arzusu ilə alışıb-yandığı hiss olunur. Bura gözəl şəkildə uyğunlaşdı və komandamızın gücünə güc qatdı. Onunla uzunmüddətli müqavilə imzaladıq və bu xəbəri ictimaiyyətə açıqlamaqdan məmnunluq duyuruq”.
Enes özü isə bunları deyib:
“Karyeramı “Bornmut”da davam etdirəcəyim üçün sevincliyəm. Bura gələrkən fiziki cəhətdən ideal durumda deyildim. Amma formamı bərpa edəndən sonra özümü bu cür turnirdə sınamaqdan böyük zövq aldım. Önümüzdəki illər üçün indidən həyəcanlanıram. Bu klubun layihəsi mənə çox uyğundu və yanvarda böyük məmnuniyyətlə bu layihənin bir parçası olmağa razılıq verdim. Birlikdə daha da inkişaf etmək üçün böyük potensiala malik olduğumuzu düşünürəm”.
Türkiyənin AÇ-2024-ə yollanan heyətində yer alacağı gözlənilən Enes Ünal 2023/24-də ikinci dövrədən etibarən “Bornmut”un heyətində 17 rəsmi oyuna çıxaraq 2 qol, 2 məhsuldar ötürmə ilə fərqləndi. Qısaca xatırladaq ki, “Bursaspor”un yetirməsi olan və Türkiyəni hələ 2015-ci ildə, yəni 18 yaşında tərk edən Enes indiyə qədər “Bornmut” və “Xetafe”dən başqa “Genk”, “Breda”, “Tvente”, “Vilyarreal”, “Levante” və “Valyadolid”in şərəfini qoruyub.
