Bu qış Türkiyə yığmasının bəzi üzvləri klublarını dəyişməyə üstünlük veriblər.

"Football-plus.az" xəbər verir ki, Samet Akaydının “Fənərbaxça”dan “Panatinaikos”a, Çağlar Söyüncünün isə “Atletiko”dan “Fənər”ə yollanmasının ardından daha iki futbolçu karyerasında yeni səhifə açıb. Söhbət Enes Ünalla Abdulkadir Ömürdən gedir.

“Xetafe”də artıq bir əfsanəyə çevrilmiş Enesin adı srağagün “Real”a qarşı oyunun iştirak ərizəsinə salınmadı. Bunun səbəbi onun premyer-liqa təmsilçisi “Bornmut”a keçməyə razılıq verməsidi. Madrid təmsilçisinin prezidenti Anxel Torres “Real”a qarşı oyundan öncə türkiyəli forvardı mövsümün sonuna qədər “Bornmut”a icarəyə verdiklərini açıqladı. Müqavilədə məcburi transfer maddəsi də mövcuddu. Yəni ingilislər yayda “Xetafe”yə 16,5 milyon avro ödəyərək bu futbolçunu daimi əsasda transfer edəcəklər. “Bursaspor”un yetirməsi olan Enes cəmi 26 yaşı olmasına baxmayaraq, Avropa futbolunda artıq yetərincə təcrübəyə malikdi. “Bornmut” onun karyerasındakı 10-cu klub olacaq! 2015-ci ildə “Mançester Siti” tərəfindən transfer edilərək ilk dəfə Avropaya yollanan Ünal bu klubda rəsmi matçda forma geyməsə də, icarə əsasında “Genk”, “Breda” və “Tvente”də çıxış edəndən sonra İspaniyaya yollandı. Burda isə sırasıyla “Vilyarreal”, “Levante” və “Valyadoli”din şərəfini qoruyan istedadlı futbolçu 2020-ci ildən “Xetafe”nin uğurları üçün tər tökürdü. Madrid təmsilçisində 3,5 mövsüm ərzində 109 rəsmi oyunda 36 qol, 10 məhsuldar ötürməlik performans sərgiləyən Enes hazırda klub tarixinin ən məhsuldar 5-ci oyunçusudu. Əslində onun ötən ilin yayında “Benfika”ya keçmək ehtimalı yüksək idi. Lissabonlular 20 milyon avro ödəməyə hazır idi. Amma Enes mayda şanssız şəkildə diz bağlarından zədələnərək əməliyyat olundu və 7 aylığa sıradan çıxdı. Bu üzdən o, cari mövsümdə cəmi 5 rəsmi oyuna çıxaraq hesabına iki məhsuldar ötürmə yaza bilib. Türkiyə yığmasında isə Ünal 32 oyun keçirib və 3 qol vurub.

“Trabzonspor”a lazım olmayan və bir müddət öncə sürpriz qərarla əsas heyətdən kənarlaşdırılan Abdulkadir Ömür isə gözlənildiyi kimi, Acun Ilıcalının komandasına, yəni “Hall Siti”yə qismət olub. 24 yaşlı solaxay vinger yeni klubu ilə 1 ili şərti olmaqla 2027-ci ilin yayına qədər müqavilə imzalayıb. Keçidin çox maraqlı detalları var. İngilislər trabzonlulara nəğd şəkildə 2,5 milyon avro ödəyəcək. Amma Abdulkadir heyətdə olduğu müddətdə “Hall Siti” premyer-liqaya yüksələcəyi təqdirdə onlar “Trabzonspor”a daha 2,5 milyon avro bonus ödəyəcək. Bundan başqa, Ömürün gələcəkdə başqa kluba transferindən əldə olunacaq gəlirin 50 faizi də qaradənizlilərə çatacaq. Və nəhayət, bu futbolçu gələcəkdə Türkiyəyə qayıtmaq istəyəcəyi halda, ilk növbədə “Trabzonspor”la danışıqlar aparmalı olacaq. “Bordo-mavililər”in öz yetirməsi olan, bütün karyerasını bu klubda keçirən Abdulkadir biri çempionluq olmaqla 4 titul qazanıb. O, “Trabzonspor”un heyətində 211 rəsmi oyunda 25 qol, 36 məhsuldar ötürməlik performans sərgiləyib. Türkiyə yığmasında isə 12 qarşılaşmada qol hesabını aça bilməyib.