Startı mayın 11-də verilən Argentina çempionatının yeni mövsümündə ayın 24-27-si aralığında 3-cü turun oyunları keçirildi.

“Football-plus.az” xəbər verir ki, Turun diqqəti daha çox cəlb edən nəticəsi son çempionun ilk məğlubiyyətini alması oldu. O da maraqlıdı ki, 2-ci turda üçhakimiyyətlilik formalaşmışdısa, indi yüksək liqada birdən-birə 6 komandanın şərikli liderliyi yaranıb.

“River Pleyt” yeni mövsümə əla başlamışdı. Son çempiona layiq nəticələr göstərən “milyonçular” açılış turunda evdə “Sentral Kordoba”nın, sonra isə “Belqrano”nun qapısından 3 cavabsız top keçirmişdilər. Martin Demiçelisin komandası bu nəticələrə öz meydanında nail olmuşdu. Amma ilk səfər sınağı çempionun məğlubiyyəti ilə nəticələndi. “Arxentinos Xuniors” ilə oyunda topa 55 faiz nəzarət etmək “River”in işinə yaramadı. Ev sahibləri rəqibini qapıya dəqiq zərbələr üzrə 9:3 hesabı ilə üstələdilər. Qonaqların qapıçısı Armani inamlı oyunu ilə komandasını darmadağından qurtardı: 37 yaşlı əlcək sahibi 6 seyv ilə çempionu biabırçı məğlubiyyətdən silas etdi. Amma o, fasilə ərəfəsində Leskanonun zərbəsinin qarşısını ala bilmədi. Beləliklə, ilk məğlubiyyət çempionu liderlikdən birdən-birə 6 pillə geri saldı.

Vitse-çempion da yeni “futbol ili”nə qələbələrlə başlamışdı. İlk iki turda “İndependyente”ni 3:1, “Atletiko Tukuman”ı 2:0 hesabı ilə məğlub edən “Talyeres de Kordoba” bu dəfə bir xal qazana bildi. Amma kordobalıları buna görə çox da qınamaq olmur. Çünki onlar “Boka Xuniors” ilə səfərdə qarşılaşdılar. İlk iki turda 3 xal qazanan ölkə nəhəngi “Talyeres de Kordoba”nı yalnız topa daha çox nəzarət etməkdə üstələyə bildi. Qonaqlar həm qapıya (16:11), həm də “çərçivə”yə zərbələr planında (5:2) üstün oldular. “Boka”nı məğlubiyyətdən qapıçısı Serxio Romero xilas etdi. Məhz onun 5 seyvi matçın başladığı hesabla sona çatmasına şərait yaratdı. Valter Ribonettonun çalışdırdığı qonaq komanda 3-cü yerə düşsə də, yenə şərikli liderlərdən biri kimi qaldı. Dieqo Martinesin başçılıq etdiyi “Boka Xuniors” isə 12-ci yerdəki mövqeyini itirmədi.
İki turdan sonra “Estudiantes”in də hesabında maksimum xal vardı. Liqa Kubokunun son qalibi hesabat turunun səfər oyununda “Lanus”a uduzdu. 1:2 hesablı məğlubiyyət Eduardo Domingesin çalışdırdığı “tələbələr”i 3-cü yerdən 8-ə saldı.

Mövsümə ardıcıl iki qələbə ilə start verən hər üç komandanın büdrəməsi bir sıra iştirakçıların yüksək yerlərə çıxmasına şərait yaratdı. Turun ən böyükhesablı qələbəsini “Rasinq” qazandı. “Tiqre”nin qapısından 4 cavabsız top keçirən Qustavo Kostasın komandası topların daha yaxşı fərqinə (+7) əsasən 1-ci yerə yüksəldi. 3-cü turdan sonra “Ximnasiya”, “Atletiko Urakan”, “Union” və “İndependyente Rivadaviya”nın da hesabında 7 xal var.

Mövsümün ilk istefasının “İndependyente”də qeydə alındığını xəbər vermişdik. Bir müddət əvvəl səhhətində problem yaranan Karlos Teves “Platense” ilə qolsuz nəticələnən oyundan sonra komandadan ayrılmaq qərarına gəlmişdi. 40 yaşlı mütəxəssisin yerinə Uqo Tokalli təyinat alıb. 76 yaşlı məşqçinin debütü “Veles Sarsfild” ilə ev oyununa təsadüf etdi. Avelyanedalılar 1:1 hesablı heç-heçəyə razılaşdılar. “İndependyente” hazırda 2 xalla 20-ci yerdədi.

3-cü tur
Arxentinos Xuniors - River Pleyt 1:0
Leskano, 40.
Boka Xuniors - Talyeres de Kordoba 0:0
Lanus - Estudiantes 2:1
Moreno, 46. Bou, 84 – Mankuso, 65.
Tiqre - Rasinq 0:4
Martirena, 7. A.Martines, 45+2. Salas, 50. Kintero, 78-p.
Ximnasiya - Banfild 3:0
Kastilyo, 74. Kastro, 78. Abaldo, 84.
Atletiko Urakan - İnstituto 1:0
Pussetto, 90+13-p.
Sarmyento - İndependyente Rivadaviya 0:1
Xil Romero, 86.
Union - Barrakas Sentral 2:0
Moskeyra, 14. Domina, 90+4.
Deportivo Riestra - Rosario Sentral 0:2
Martines Dupuy, 9. Ovyedo, 88.
Belqrano - Sentral Kordoba 2:1
Reyna, 58; 68 – Molina, 45+4-p.
Nyuellz Old Boyz - Defensa y Xustisiya 1:0
Mendes, 80.
İndependyente - Veles Sarsfild 1:1
Avalos, 63 – Akino, 32-p.
Atletiko Tukuman - Platense 1:1
Estiqarribiya, 82 – Pelleqrino, 53-p.
“Qodoy Krus” – “San Lorenso” oyunu hesab 1:1 olarkən fasilə zamanı rəqib azarkeşlərin qarşıdurmasına görə dayandırılıb.

1. Rasinq 3 2 1 0 11-4 7
2. Ximnasiya 3 2 1 0 7-2 7
3. Talyeres de Kordoba 3 2 1 0 5-1 7
4. Atletiko Urakan 3 2 1 0 5-2 7
5. Union 3 2 1 0 4-1 7
6. İndependyente Rivadaviya 3 2 1 0 3-0 7
7. River Pleyt 3 2 0 1 6-1 6
8. Estudiantes 3 2 0 1 4-2 6
9. Nyuellz Old Boyz 3 2 0 1 3-1 6
10. Arxentinos Xuniors 3 2 0 1 4-5 6
11. Rosario Sentral 3 1 1 1 5-4 4
12. Boka Xuniors 3 1 1 1 4-3 4
13. İnstituto 3 1 1 1 3-3 4
14. Lanus 3 1 1 1 3-4 4
15. Veles Sarsfild 3 1 1 1 3-4 4
16. Atletiko Tukuman 3 1 1 1 2-3 4
17. Barrakas Sentral 3 1 1 1 2-3 4
18. Belqrano 3 1 1 1 6-8 4
19. Deportivo Riestra 3 1 0 2 1-4 3
20. İndependyente 3 0 2 1 2-4 2
21. Platense 3 0 2 1 1-3 2
22. San Lorenso 2 0 1 1 1-2 1
23. Qodoy Krus 2 0 1 1 0-1 1
24. Sarmyento 3 0 1 2 2-4 1
25. Defensa y Xustisiya 3 0 1 2 2-5 1
26. Banfild 3 0 1 2 1-5 1
27. Tiqre 3 0 1 2 1-6 1
28. Sentral Kordoba 3 0 0 3 3-9 0
Bombardirlər: Kolidio (River Pleyt), Xara (Belqrano), R.Martines (Rasinq), Pussetto (Atletiko Urakan), S.Rodriges (İnstituto) - 3.