İspaniya La Liqasında yenicə sona çatan 2023/24 mövsümün laureatları müəyyənləşib.

“Football-plus.az” xəbər verir ki, 4 nominasiya üzrə qaliblər müxtəlif klubların üzvləridi.

Liqanın rəsmi saytının məlumatına görə, mövsümün ən yaxşı oyunçusu üçün nəzərdə tutulan mükafata “Real”ın yarımmüdafiəçisi Cud Bellingem layiq bilinib. 20 yaşlı futbolçu La Liqanın son mövsümündə 28 matç keçirib, 19 qol vurub və 6 məhsuldar ötürmə verib. Başqa sözlə, Cud La Liqadakı ilk mövsümündə komandasının çempionluğunda böyük rol oynayıb.

Mövsümün ən yaxşı gənc oyunçusu adını Lamin Yamal qazanıb. O, “Barselona”nın formasında ölkə çempionatında meydana çıxdığı 37 matçda 5 qol vurub.
“Jirona”nı çalışdıran Miçel Sançes mövsümünün ən yaxşı məşqçisi seçilib. 48 yaşlı mütəxəssis mükafat uğrunda mübarizədə Karlo Ançelotti (Real), Dieqo Simeone (Atletiko), Ernesto Valverde (Atletik) və Marselino Qarsiya Toralı (Vilyarreal) qabaqlayıb. “Jirona” mövsümü 3-cü yerdə başa vurub və klub tarixində ilk dəfə Çempionlar Liqasına vəsiqə qazanıb. Miçel komandanı 2021-ci ilin yayından çalışdırır. Onun klubla müqaviləsinin müddəti 2026-cı ilin yayına qədərdi.

Son mövsümün ən baxımlı qolu da müəyyənləşib. Bu nominasiyanın qalibi “Osasuna”nın müdafiəçisi Xesus Areso olub. Onun 21-ci turun “Xetafe” ilə ev oyununda vurduğu qol komandasına 3:2 hesablı qələbə gətirmişdi.