İngiltərə premyer-liqasında yenicə başa çatan mövsümün ən yaxşıları müəyyənləşib. Üç nominasiya üzrə laureat adına “Mançester Siti”nin üzvləri layiq görülüblər.


"Football-plus.az" xəbər verir ki, komandanı ardıcıl 3-cü çempionluğa daşıyan Xosep Qvardiola mövsümün ən yaxşı məşqçisi seçilib. İspaniyalı mütəxəssis karyerasında 4-cü dəfə bu mükafata layiq görülüb. O, öz nəticəsi ilə Joze Mourinyo və Arsen Vengeri qabaqlayıb və yalnız mükafatı 11 dəfə qazanan Aleks Feryusondan geri qalır.

Premyer-liqada mövsümün ən yaxşı futbolçusunun adına da aydınlıq gəlib. Bu nominasiyanın qalibi “Mançester Siti”nin hücumçusu Erlinq Holann olub. Norveçli futbolçu mövsüm ərzində premyer-liqada keçirdiyi 35 oyunda 36 qol vurub və 8 məhsuldar ötürmə verib. O, MS-nin bu fərdi mükafata layiq görülən 4-cü, ardıcıl isə 3-cü oyunçusu olub. Bunu əvvəllər Vensan Kompani (2011/12), Kevin de Bruyne (2019/20, 2021/22) və Ruben Diaş (2020/21) bacarıb. Holann ən yaxşı oyunçunu müəyyənləşdirən sorğuda oyundaşı De Bruyne, Harri Keyn (Tottenhem), Markus Reşford (Mançester Yunayted), Martin Edeqor, Bukayo Saka (hər ikisi “Arsenal”) və Kiran Trippyeri (Nyukasl) qabaqlayıb.

Erlinq mövsümünün ən yaxşı gənc oyunçusu üçün ayrılan mükafata da sahib çıxıb. 22 yaşlı futbolçu səsvermədə Sven Botman, Aleksander İsak (hər ikisi “Nyukasl”), Moyses Kaysedo, Aleksis Makallister (hər ikisi “Brayton”), Qabriel Martinelli, Martin Edeqor və Bukayo Sakanı (hamısı “Arsenal”) qabaqlayıb. Holannın bir mövsümdə premyer-liqanın ən yaxşı oyunçusu və ən yaxşı gənc oyunçusu seçilən ilk futbolçu kimi tarixə düşdüyünü də vurğulayaq.